Իրանին հասցրած հարվածներով ԱՄՆ-ն միջոցներ է ձեռնարկել՝ վերացնելու Թեհրանի կողմից միջուկային զենքի ստեղծման ռիսկը, որը նրան երբեք չպետք է թույլ տրվի ձեռք բերել։ Այս մասին հայտարարել է Մեծ Բրիտանիայի վարչապետ Քիր Սթարմերը՝ մեկնաբանելով իսլամական հանրապետության միջուկային օբյեկտներին ԱՄՆ-ի գիշերային հարվածները։

«Իրանի միջուկային ծրագիրը լուրջ սպառնալիք է միջազգային անվտանգության համար։ Իրանին երբեք չպետք է թույլ տրվի միջուկային զենք մշակել, և ԱՄՆ-ն միջոցներ է ձեռնարկել այս սպառնալիքը վերացնելու համար»,- հայտարարել է բրիտանական կառավարության ղեկավարը։

«Իրավիճակը Մերձավոր Արևելքում մնում է անկայուն, և տարածաշրջանում կայունության ապահովումն առաջնահերթություն է։ Մենք Իրանին կոչ ենք անում վերադառնալ բանակցությունների սեղան և հասնել դիվանագիտական լուծման՝ այս ճգնաժամից դուրս գալու համար»,- նշվում է Սթարմերի տարածած հայտարարության մեջ։

Մեծ Բրիտանիան չի մասնակցել ԱՄՆ-ի հարվածներին, հայտնում է Sky News հեռուստաալիքը։