Ռուսաստանի Անվտանգության խորհրդի նախագահի տեղակալ Դմիտրի Մեդվեդևն իր Telegram-ալիքում գնահատել է Իրանի տարածքին հասցված ամերիկյան գիշերային հարվածների հետևանքները՝ նշելով, որ ԱՄՆ նախագահ Դոնալդ Թրամփը, որը եկել էր որպես խաղաղարար նախագահ, իր երկրի համար նոր պատերազմ է սկսել։

«Ինչի՞ հասան ամերիկացիներն Իրանի երեք կետերին հասցված իրենց գիշերային հարվածով։

  • Միջուկային ցիկլի կրիտիկական ենթակառուցվածքը, ըստ ամենայնի, չի տուժել կամ տուժել է աննշան։

  • Միջուկային նյութերի հարստացումը, իսկ այժմ կարելի է ուղիղ ասել՝ և միջուկային զենքի ապագա արտադրությունը, կշարունակվի։

  • Մի շարք երկրներ պատրաստ են Իրանին ուղղակիորեն մատակարարել իրենց միջուկային զինամթերքը։

  • Իսրայելը հարվածի տակ է, պայթյուններ են որոտում, մարդիկ խուճապի մեջ են։

  • ԱՄՆ-ն ներքաշված է նոր հակամարտության մեջ՝ ցամաքային գործողության հեռանկարով։

  • Իրանի քաղաքական ռեժիմը պահպանվել է, ընդ որում, մեծ հավանականությամբ այն ավելի է ուժեղացել։

  • Ժողովուրդը համախմբվում է հոգևոր ղեկավարության շուրջ, ընդ որում՝ նույնիսկ այն մասը, որը նրան չէր համակրում։

  • Թրամփը, որը եկել էր որպես խաղաղարար նախագահ, ԱՄՆ-ի համար նոր պատերազմ է սկսել։

  • Աշխարհի երկրների բացարձակ մեծամասնությունը դեմ է Իսրայելի և ԱՄՆ-ի գործողություններին։

Նման հաջողություններով Թրամփը Խաղաղության Նոբելյան մրցանակ չի տեսնի, նույնիսկ չնայած այս անվանակարգի ամբողջական կոռումպացվածությանը։ Լավ սկիզբ է, շնորհավորում եմ, պարո՛ն նախագահ»,- գրել է Մեդվեդևը։