նախընտրելի դարձնել
Պենտագոնի բարձրաստիճան պաշտոնյաները նոր մանրամասներ են բացահայտել Իրանի միջուկային երեք օբյեկտներին հարվածելու ԱՄՆ գործողության մասին։
CBSnews-ի հաղորդմամբ, ԱՄՆ զինված ուժերի շտաբների պետերի միացյալ կոմիտեի նախագահ, գեներալ Դեն Քեյնը հայտարարել է, որ դա «ԱՄՆ պատմության մեջ B-2-ի ամենախոշոր մարտական թռիչքն» էր, որը «չափազանց լուրջ վնաս և ավերածություններ» է պատճառել թիրախներին։
«Սա խիստ գաղտնի առաքելություն էր, և Վաշինգտոնում շատ քչերը գիտեին դրա ժամանակի և էության մասին», - կիրակի առավոտյան Պենտագոնում ճեպազրույցի ժամանակ ասել է գեներալ Քեյնը՝ բացահայտելով Ֆորդոյի, Նաթանզի և Սպահանի իրանական միջուկային օբյեկտներին հարվածելու մանրամասները։
Նա ասել է, որ «Կեսգիշերային մուրճ» անվանումով գործողության մեջ ներառվել են յոթ B-2 Spirit ռազմավարական ռմբակոծիչներ, որոնք Միսսուրիի բազայից թռել են դեպի Իրան։ Թռիչքը տևել է 18 ժամ և պահանջել է օդում իրականացված մի քանի լիցքավորում։ Մերձավոր Արևելքի վրայով անցնելուց հետո ռմբակոծիչները հանդիպել են աջակցող կործանիչների և ինքնաթիռների՝ «բարդ և ճշգրիտ հաշվարկված մանևրային գործողության շրջանակում», - բացատրել է Քեյնը։
Թռիչքի երթուղու քարտեզի ֆոնին Քեյնը ներկայացրել է գործողության ժամանակացույցը.
Շաբաթ օրը՝ արևելյան ժամանակով մոտավորապես ժամը 17:00-ին, ինքնաթիռների Իրանի օդային տարածք մտնելուց մի քանի րոպե առաջ, ամերիկյան սուզանավը երկու տասնյակից ավելի Tomahawk թևավոր հրթիռներ է արձակել Սպահանի թիրախների վրա։
Թիրախներին մոտենալիս՝ ԱՄՆ-ն «խաբկանքի մի քանի մարտավարություններ է կիրառել, այդ թվում՝ կեղծ թիրախներ», իսկ կործանիչները մաքրել են օդային տարածքը՝ ստուգելով թշնամու ինքնաթիռների և հակաօդային պաշտպանության համակարգերը։
«Մենք առայժմ տեղյակ չենք մոտեցման ընթացքում ԱՄՆ ինքնաթիռների վրա որևէ կրակոցների մասին», - ասել է Քեյնը։
Արևելյան ժամանակով մոտ ժամը 18:40-ին (Թեհրանի ժամանակով ժամը 02:10-ին) առաջատար B-2-ը Ֆորդոյի օբյեկտի վրա երկու GBU-57 հակաբունկերային ռումբ (MOP) է նետել:
Հաջորդ 25 րոպեների ընթացքում Ֆորդոյի և Նաթանզի վրա նետվել է ընդհանուր առմամբ այդպիսի 14 ռումբ:
Tomahawk հրթիռները հարվածել են Սպահանին արդեն այն բանից հետո, երբ ռումբերը նետվել էին մյուս երկու թիրախների վրա։
«Իրանական ինքնաթիռներն օդ չեն բարձրացել, և ակնհայտորեն մեր հարձակումը չի հայտնաբերվել օդային պաշտպանության որևէ համակարգի կողմից։ Մեր առաքելության ողջ ընթացքում պահպանվել է անակնկալի տարրը», - նշել է Քեյնը։
Ըստ նրա, գործողությանը մասնակցել է ավելի քան 125 ամերիկյան ինքնաթիռ, այդ թվում՝ ռմբակոծիչներ, կործանիչներ, լիցքավորող և հետախուզական ինքնաթիռներ։ Օգտագործվել է ավելի քան 75 ճշգրիտ կառավարվող զինամթերք։
«Նախնական վնասի վերլուծությունը ցույց է տալիս, որ բոլոր երեք թիրախներն էլ կրել են չափազանց լուրջ վնասներ և ավերածություններ», - հավելել է Քեյնը՝ ընդգծելով, որ լիարժեք գնահատականը ժամանակ կպահանջի։
ԱՄՆ պաշտպանության նախարար Փիթ Հեգսեթը գործողությունն անվանել է «անհավանական և կործանարար հաջողություն ունեցող»։
«Գլխավոր հրամանատարից ստացված հրամանը հստակ, հզոր և նպատակաուղղված էր», - նույն ճեպազրույցի ժամանակ ասել է Հեգսեթը։
«Մենք կործանարար հարված հասցրեցինք Իրանի միջուկային ծրագրին, բայց կարևոր է ընդգծել, որ թիրախը իրանական զինվորականները կամ իրանական ժողովուրդը չէին»։
Նա հավելել է. «Նախագահ Թրամփի մշակած գործողությունը հանդուգն և փայլուն էր, որը աշխարհին ցույց տվեց, որ ամերիկյան զսպման ուժը վերադարձել է։ Երբ այս նախագահը խոսում է, աշխարհը պետք է լսի»։
«Մեր B-2-ները մտան ու դուրս եկան… այնպես, որ աշխարհը նույնիսկ չնկատեց։ Դա պատմական գործողություն էր՝ 2001 թվականից ի վեր B-2-ի ամենաերկար մարտական թռիչքը և GBU-57 MOP-ի առաջին մարտական կիրառումը»։
