«Ֆերնան» արևադարձային փոթորիկը ձևավորվել է շաբաթ օրը Ատլանտյան օվկիանոսում, սակայն այն հեռու է եղել ցամաքից, և, ըստ կանխատեսումների, կմնա բաց օվկիանոսում, հայտնում է Associated Press-ը։

Մայամիի Փոթորիկների ազգային կենտրոնը հայտնել է, որ ուշ երեկոյան փոթորիկը գտնվել է Բերմուդյան կղզիներից մոտ 520 կիլոմետր դեպի հարավարևելք։

Քամու առավելագույն արագությունը կազմել է 65 կմ/ժ, այն շարժվել է դեպի հյուսիսարևելք՝ 26 կմ/ժ արագությամբ։

Փոթորիկների կենտրոնը հայտնել է, որ, ինչպես սպասվում է, «Ֆերնանը» կանցնի «Բերմուդյան կղզիներից զգալիորեն արևելք», և ափամերձ գոտում որևէ հսկողություն կամ նախազգուշացում չի գործել։