նախընտրելի դարձնել
ԱՄՆ դեսպանատունը Բաղդադում շաբաթ օրը ենթարկվել է հարձակման այն հարվածներից հետո, որոնց հետեւանքով մայրաքաղաքում զոհվել են իրանամետ ազդեցիկ խմբավորման երեք անդամներ, տեղեկացրել են անվտանգության ծառայության աղբյուրները, տեղեկացրել է AFP-ը։
AFP-ի լրագրողի փոխանցմամբ՝ շաբաթ առավոտյան տեղի ունեցած պայթյուններից կարճ ժամանակ անց ԱՄՆ դիվանագիտական առաքելության շենքից ծխի սեւ ամպ է բարձրացել։
Անվտանգության ծառայության երկու աշխատակիցներ AFP-ին հայտնել են, որ անօդաչու թռչող սարք է հարվածել դեսպանատան համալիրին։
Ինչպես ընդգծել է լրատվամիջոցը, սա պատերազմի սկսվելուց ի վեր Բաղդադում ԱՄՆ դեսպանատան վրա կատարված երկրորդ հարձակումն է։
Շաբաթ օրն ավելի ուշ դեսպանատունը հրապարակել էր անվտանգության ծառայության թարմացված զգուշացում՝ կոչ անելով քաղաքացիներին «անմիջապես լքել տարածքը», սակայն խորհուրդ տալով չգնալ մայրաքաղաքում գտնվող դեսպանատուն կամ Էրբիլում գտնվող գլխավոր հյուպատոսություն՝ «հաշվի առնելով Իրաքի օդային տարածքում հրթիռների, անօդաչու թռչող սարքերի եւ ռեակտիվ արկերի հարվածի շարունակական ռիսկը»։
«Իրանի հետ կապված ահաբեկչական խմբավորումները բազմիցս հարձակվել են Բաղդադի միջազգային գոտու վրա։ Բազմիցս հարձակումներ են տեղի ունեցել նաեւ Էրբիլի միջազգային օդանավակայանի եւ գլխավոր հյուպատոսության տարածքում»,- նշվել է դեսպանատան հայտարարության մեջ։
