Համայն Վրաստանի Կաթողիկոս-Պատրիարք Իլիա II-ի հուղարկավորությանը ներկա է եղել միջազգային մշակութային համագործակցության հարցերով Ռուսաստանի նախագահի հատուկ ներկայացուցիչ Միխայիլ Շվիդկոյը, հայտնում է Կրեմլի մամուլի ծառայությունը։

Ըստ հաղորդագրության, նա Ռուսաստանի Դաշնության նախագահի խորին ցավակցություններն է փոխանցել Վրաստանի հոգևոր դասին և ժողովրդին։

Շվիդկոյի ներկայությունը Իլիա II-ի հուղարկավորությանը հաստատել են նաև վրացական լրատվամիջոցները։

Նշենք, որ Իլիա II-ի հուղարկավորությանը Հայաստանը ներկայացնում է հանրապետության նախագահ Վահագն Խաչատուրյանը։ Ամենայն Հայոց Կաթողիկոս Գարեգին Երկրորդը չի կարողացել հրաժեշտ տալ վրաց Պատրիարքին, քանի որ քննիչը չի բավարարել երկրից մեկնելու արգելքը վերացնելու վերաբերյալ միջնորդությունը։

Իլիա II-ը մահացել է մարտի 17-ին՝ 93 տարեկան հասակում, ստամոքսային արյունահոսությունից հետո։ Նա Վրաց ուղղափառ եկեղեցին ղեկավարել է գրեթե կես դար և կյանքի վերջում համարվում էր աշխարհի ամենահեղինակավոր ուղղափառ հիերարխներից մեկը՝ եկեղեցու գլխին գտնվելու տևողությամբ ամենատարեցն ու ձեռնադրության ամսաթվով ամենատարեց գործող եպիսկոպոսը։ Նրա անունը կապում են ԽՍՀՄ փլուզումից հետո երկրի եկեղեցական կյանքի վերածննդի հետ. Իլիա II-ին անվանում են անկախ Վրաստանի պատմության ամենահեղինակավոր դեմքերից մեկը և վերջին տասնամյակների ազգի հոգևոր առաջնորդը։