ՆախընտրելիՖրանսիայում պատմության եւ աշխարհագրության նոր դասագրքերի մեջ Հայոց ցեղասպանության մասին նյութի ընդգրկումը համարվում է այս երկրի Կրթության նախարարության հատուկ հանձնաժողովի նախաձեռնությունը: Այս մասին NEWS.am-ի թղթակցի հետ զրույցում հայտնել է Ֆրանսիայում «Հայ դատի» գրասենյակի ղեկավար Հրաչյա Վարժապետյանը:
Վարժապետյանի խոսքով, 10-րդ դասարանցիների (Ֆրանսիական հանրակրթական համակարգի համաձայն` 2-րդ դասարան) գրքերում բաժնի ավելացումը հանդիսանում է հին դասագրքերի փոփոխության հետեւանք. «Բաժինը կազմված է երկու էջից, ինչը մեծ աղմուկի պատճառ է դարձել Թուրքիայում»:
Անդրադառնալով թուրքական լրատվամիջոցներում հայտնված այն տեղեկատվությանը, ըստ որի Ֆրանսիայի նախագահ Ֆրանսուա Օլանդը հայտնել է, որ դասագրքերում Հայոց ցեղասպանության վերաբերյալ նյութերի ընդգրկմամբ զբաղվում է հատուկ հանձնաժողով` Վարժապետյանը նշել է. «Շատ կարեւոր է, որ Հայոց ցեղասպանության մասին նյութեր ընդգրկելու նախաձեռնությունը պատկանում է ոչ թե նախագահ Օլանդին, այլ կրթության հարցերով զբաղվող հանձնաժողովին, հակառակ դեպքում հարցը քաղաքական ենթատեքստ կունենար: Բայց այս դեպքում ավելացումը կատարվել է Կրթության նախարարության որոշմամբ, եւ սա նշանակում է, որ քաղաքական անհաժեշտության պահի թելադրանք չի եղել»:
Նշենք, որ Ֆրանսիայում պատմության եւ աշխարհագրության դասագրքերում ավելացվել են Օսմանյան կայսրությունում Հայոց ցեղասպանությանը վերաբերող բաժին, ինչը առաջ է բերել Թուրքիայի դժգոհությունը:
Ավելի վաղ NEWS.am-ը հայտնել է, որ Ֆրանսիայի դպրոցական դասագրքերում Հայոց ցեղասպանության վերաբերյալ նյութերի ավելացման մասին տեղեկատվությունը լրջորեն անհանգստացրել է Թուրքիայի Արտգործնախարարությանը: Թուրքիայի ԱԳՆ-ն սկսել է ուսումնասիրել 4-րդ դասարանի պատմության ֆրանսիական դասագրքերը, որտեղ, լրատվության համաձայն, նյութեր են զետեղվել Հայոց ցեղասպանության վերաբերյալ:
Պատասխանալելով այն հարցին, թե արդյոք տեղյակ է ֆրանսիական դասագրքերում Հայոց ցեղասպանության նյութի առկայության մասին` Ֆրանսուա Օլանդը պատասխանել է, որ ինքը նման հրաման չի արձակել` ընդգծելով, որ նման հարցերով արդեն վաղուց զբաղվում է հատուկ հանձնաժողովը:
