Նոյեմբերի 16-ին Նոր Արեշի վարձակալած տանը տեղի ունեցած ողբերգության հետեւանքով մահացած, ազգությամբ հնդիկ Դենիշ Բաբուի ծնողները դիմել են Հնդկաստանում Հայաստանի դեսպանատուն՝ Հայաստանի վիզա ստանալու համար։ Այս մասին NEWS.am-ին ասաց Հայաստանում բնակվող, ազգությամբ հնդիկ ուսանողը, որը վստահեցրեց, որ անձամբ է ճանաչում Դենիշին, սակայն խնդրեց չհրապարակել իր անունը։
«Ընդամենը 20 րոպե առաջ եղբոր հետ եմ խոսել։ Սպասում են դեսպանատան պատասխանին, որ Հայաստան գան, հետո կորոշեն՝ ինչ անել»։
Մեր զրուցակիցն ասաց, որ Դենիշը Հայաստան էր եկել Աստղիկ Աղաջանյանի հետ ամուսնանալու նպատակով, ավելին՝ հենց Աստղիկի ընտանիքն էր նրան հրավեր ուղարկել. «Դենիշն ամեն ինչ թողել էր Հնդկաստանում ու եկել Հայաստան։ Պլանավորում էին ամուսնանալ ու այստեղ մնալ»։
Նրա խոսքով՝ Դենիշին օդակայանում դիմավորել է Աստղիկը. «Նրա գալու հենց առաջին օրը հանդիպեցինք Հանրապետության Հրապարակում։ Աստղիկը նրան դիմավորել էր օդակայանում եւ միանգամից հրապարակ բերել։ Ծանոթացիր՝ սա իմ ընկերուհինէ՝ girlfriend-ը։ Պատրաստվում ենք ամուսնանալ՝ ասաց Դենիշը։ Աստղիկը մեզ մենակ թողեց ու գնաց»։
Աստղիկի հեռանալուց հետո Դենիշը, ըստ մեր զրուցակցի, իրեն խնդրել էր օգնել աշխատանք գտնելու հարցում. «Ասաց՝ չեմ կարող առանց աշխատանք ունենալու գնալ ծնողներից ձեռքը խնդրել։ Ասաց՝ Հնդկաստանում ես ամեն ինչ ունեի, իսկ այստեղ ոչինչ չունեմ։ Ինձ աշխատանք է պետք»։ Ընկերոջ օգնությամբ Դենիշը պրակտիկա է անցել Telerade-ում։
Մեր զրուցակիցն ասաց, որ Աստղիկը նույնպես սիրում էր Դենիշին։ «Հարյուր տոկոսով վստահ եմ։ Եվ Դենիշի, եւ Աստղիկի ծնողները գիտեին նրանց հարաբերությունների մասին։ Նույնիսկ Աստղիկն ու իր մայրը հատուկ Հնդկաստան էին գնացել՝ մասնակցելու Դենիշի եղբոր հարսանիքին»։
Նրա խոսքով՝ ընկերները չեն հավատում ոստիկանության տարածած ինքնասպանության վարկածին։ Նրանք վստահ են, որ տեղի է ունեցել սպանություն։
Ինչպես ավելի վաղ հաղորդել էր NEWS.am-ը, ոստիկանության լրատվության վարչությունից հայտնում են, թե նոյեմբերի 16-ին, ժամը 19.00-ին, ոստիկանության Երեւան քաղաքի վարչության օպերատիվ կառավարման կենտրոն է զանգահարել մի քաղաքացի եւ հայտնել, որ Երեւանի Նոր Արեշի 17-րդ եւ 8-րդ փողոցների անկյունում գտնվող իր տուն է մտել արյունլվա մի անծանոթ աղջիկ, իսկ մյուս անծանոթն ընկած է փողոցում: Նույն օրը, ժամը 19.30-ին, «Էրեբունի» բժշկական կենտրոնից ոստիկանության Էրեբունու բաժնում հաղորդում է ստացվել, որ «պարանոցի եւ կրծքավանդակի ձախ կեսի բազմաթիվ կտրած-ծակած վերքեր» ախտորոշմամբ Նոր Արեշի 8-րդ փողոցի թիվ 14 տան մոտից բուժօգնության է տեղափոխել 24-ամյա Ա. Ա.-ն:
Ըստ շտապօգնության բժշկի հայտարարության` Նոր Արեշի 8-րդ եւ 17-րդ փողոցների խաչմերուկում տեղի է ունեցել դանակահարություն, իսկ ժամը 19.40-ին, նույն բուժկենտրոնից հաղորդում է ստացվել, որ կենսաբանական մահ ախտորոշմամբ Նոր Արեշի 8-րդ եւ 17-րդ փողոցների խաչմերուկից իրենց մոտ է տեղափոխվել 1985թ. ծնված տղամարդու դիակ: Պարզվել է, որ Հնդկաստանի Հանրապետության քաղաքացի, 1985 թ. ծնված Դենիշ Բաբու Շահաբ Սինգխը Նոր Արեշի 17-րդ փողոցում գտնվող իր վարձակալած տանն ամուսնության առաջարկ է արել Ա. Ա.-ին, սակայն վերջինիս կողմից մերժում ստանալուց հետո խոհանոցային դանակով որովայնի շրջանում բազմաթիվ մարմնական վնասվածքներ է պատճառել նրան, այնուհետեւ նույն դանակով իր պարանոցի զարկերակները կտրելով` ինքնասպանություն է գործել:
Ըստ բժշկի տեղեկանքի` Ա. Ա.-ն ի վիճակի չի եղել հաղորդում տալու: Հանցագործության գործիք դանակն առգրավված է: Փաստի առթիվ ՀՀ քրեական օրենսգրքի 34-104 հոդվածի 1-ին մասի հատկանիշներով հարուցվել է քրեական գործ: Կատարվում է նախաքննություն:
