«Երկրապահական ընտանիքը, Արցախյան ազատամարտի բոլոր մասնակիցները, անգամ` 2 ոտքից հաշմանդամները, պատրաստ են դուրս գալ հակառակորդի դեմ, բայց այսօր ֆիդայության ժամանակները չեն, այսօր ունենք պետություն, սահմանին կանգնած է պետական բանակը: Այս մասին, NEWS.am-ի թղթակցի հետ զրույցում նշել է ԵԿՄ ղեկավար, գեներալ-լեյտենանտ Մանվել Գրիգորյանը:
«Անթույլատրելի է, որ ամեն ոք ինքնագլուխ քայլերի դիմի: Այդ պատճառով` պատրաստակամություն հայտնելով` մենք սպասում ենք հանձնարարականի»,-ասել է նա՝ պատասխանելով հարցին, թե ինչու երկրապահները որեւէ քայլ չեն ձեռնարկում ինը օր շարունակ խոցված ուղղաթիռի օդաչուների մարմինները անկման վայրից դուրս բերելու կապակցությամբ:
«Հենց նոյեմբերի 12-ին ես եռասերունդ Երկրապահի անունից հանդես եկա հայտարարությամբ` նշելով, որ պատրաստ ենք մեկնել առաջին գիծ, պատրաստ ենք թշնամու կրակահերթերի տարափի տակ դուրս բերել մեր տղաների աճյունները: Այս հայտարարությանն արձագանքեցին ԵԿՄ տարածքային բաժանմունքներն ու անգամ սփյուռքյան ներկայացուցչությունները: Բոլորն էլ պատրաստակամություն էին հայտնում ինձ հետ միասին ստանձնել նման հանձնարարության իրագործումը»,-նշել է Մանվել Գրիգորյանը` վստահեցնելով, որ իր հայտարարությունն ուժի մեջ է:
«Սակայն անթույլատրելի է, որ ինքնագլուխ քայլերի դիմեն: Այդ պատճառով` պատրաստակամություն հայտնելով` մենք սպասում ենք հանձնարարականի: Նման որոշումները պետք է զինված ուժերի գերագույն գլխավոր հրամանատարը կայացնի: Նա բոլորից լավ է պատկերացնում իրավիճակը, նա բոլորից լավ կարող է որոշել վճռական գործողությունների անցնելու ճշգրիտ պահը, որպեսզի կարողանանք եւ մեր խնդիրը ճշգրտորեն կատարել, եւ թշնամու սադրանքներին չտրվել»,-ասել է նա:
Խորը վշտակցություն հայտնելով հերոս օդաչուների ընտանիքների անդամներին` գեներալը ներողություն է խնդրել նրանցից կատարվածի համար:
«Այս տղաները զոհվեցին ուսումնամարզական վարժանքների ժամանակ, բայց վստահաբար կարելի է պնդել, որ նրանք զոհվել են ծառայողական պարտականությունները կատարելիս: Հերոս սպաները զոհվել են հանուն հայրենիքի, հանուն մեր վաղվա օրվա, հանուն մեր ընտանիքների: Այս վարժանքներն էլ հայոց բանակի մարտունակության բարձրացմանն էին նպատակաուղղված:
Թող այս քաջերի ընտանիքների անդամները ներեն մեզ, եթե կարող են: Իսկ որպես պատերազմի թոհուբոհով անցած հրամանատար, որպես կյանքում շատ բան տեսած մարդ` ասում եմ, որ թուրքի առաջ չի կարելի կոտրվել: Մենք ոչ թե պետք է խեղճանանք, այլ պետք է ժամանակի ընթացքում պարտադրենք թուրքին զղջալ իր արարքի համար, իր անմարդկային վերաբերմունքի համար: Ինչպես 1994-ի մայիսին դրանց ծնկի բերեցինք, չոքած մեզանից հրադադար էին մուրում, այնպես էլ հիմա պետք է այդ օրը գցենք դրանց: Թող մեր խաղաղասիրությունը չշփոթեն մարտական պատրաստվածության հետ»:
Մանվել Գրիգորյանը անդրադարձել է նաեւ միջազգային հանրություն անտարբերությանը. «Միջազգային հանրությունը հնարավոր է, ինչ-ինչ հարցերում փորձի մեզ օգնել, բայց ցավն էլ մերն է, ցավի տերն էլ մենք ենք: Հայ ազգն է կորուստ ունեցել, մենք պետք է մտածենք վիճակից ելքեր գտնելու մասին: Միջազգային հանրությունը միայն անգիր կոնվենցիաների անուններ է տալիս, բայց չի կարողանում էդ շակալներին հասկացնել, որ մարդը մարդու բարեկամն է: Բայց ոչինչ: Թուրքը եթե այլ պետությունների միջնորդական լեզուն չհասկացավ, լավով չեկավ համաձայնության, ստիպված ենք լինելու մեր բազկի ուժը դարձյալ ցուցադրել: Լավով լինի, զոռով լինի, մեր ազգային հարցերը լուծելու ենք: Իսկ մեր այս տղաները, որ նահատակվեցին հանուն հայրենիքի, սերունդների համար դաստիարակության օրինակ են լինելու»: