Գյումրիում սպանված Ավետիսյանների հարազատները՝ Հասմիկ Ավետիսյանի դուստրը եւ քույրերը այսօր՝ հունվարի 26-ին, Գյումրիի քաղաքապետարանում իրենց նախաձեռնությամբ հանդիպել են քաղաքապետ Սամվել Բալասանյանի հետ՝ քննարկելով իրենց մտահոգող մի քանի խնդիրներ։
Գյումրիի քաղաքապետի մամուլի քարտուղար Լիլիթ Մակարյանը NEWS.am-ի հետ զրույցում ասաց, որ հարազատները խնդրել են աջակցել իրենց հոգեբանի ծառայությունից օգտվելու հարցում՝ նշելով, որ իրենք սթրեսային վիճակում են, վախեցած են եւ հոգեբանի կարիք ունեն։
Սամվել Բալասանյանը հնարավորին սեղմ ժամկետում խոստացել է լուծել այդ խնդիրը։
Հանդիպմանը քննարկվել է նաեւ 6-ամսական Սերյոժա Ավետիսյանի անունով բացված հաշվեհամարին փոխանցված գումարների տնօրինման հարցը։ Պայմանավորվածություն է ձեռք բերվել գումարն օգտագործել Ավետիսյանների գերեզմանների շինարարության համար։
Ավելի վաղ NEWS.am-ը հայտնել էր, որ հունվարի 12-ին Գյումրիի Մյասնիկյան փողոցի տներից մեկում հրազենային վնասվածքներից սպանված են գտել Ավետիսյանների ընտանիքի 6 անդամներին, այդ թվում՝ մեկուկես տարեկան դստերը: Վեց ամսական Սերյոժա Ավետիսյանը վնասվածքներ էր ստացել եւ տեղափոխվել է հիվանդանոց, սակայն դեպքից 7 օր անց հիվանդանոցում մահացել է նաեւ նա:
Այս գործով նույն օրը, կեսգիշերին մոտ ձերբակալվել է ռուս զինվորական Վալերի Պավելի Պերմյակովը, ըստ պաշտոնական տվյալների՝ հայ-թուրքական սահմանի մոտ: Ներկայումս նա գտնվում է ռուսական ռազմակայանում: Նրան կալանավորել եւ մեղադրանք են առաջադրել ՌԴ Քրեական օրենսգրքի 105-րդ հոդվածի 2-րդ (երկուսից ավելի մարդկանց սպանություն) եւ 338-րդ հոդվածի 2-րդ մասի (դասալքություն՝ ծառայողական զենքով): Հունվարի 21-ին Պերմյակովին մեղադրանք են առաջադրել նաեւ հայ քննիչները՝ ՀՀ Քրեական օրենսգրքի 104-րդ հոդվածի 2-րդ մասի 1-ին կետով՝ երկու եւ ավելի անձանց դիտավորյալ սպանության համար: Ռուս զինծառայողն ընդունել է առաջադրված մեղադրանքը:
