Իշխանափոխություն պահանջող «Ազատագրում» շարժումն այսօր՝ օգոստոսի 1-ին, միացավ Հանրապետության հրապարակում արդեն 6-րդ օրը էլեկտրաէներգիայի սակագնի թանկացման որոշումը չեղարկելու պահանջով նստացույց անցկացնող «Ոտքի Հայաստան» շարժման ակտիվիստներին:
Շարժման երկու տասնյակ անդամները՝ հիմնականում տարեց քաղաքացիներ, Հանրապետության հրապարակ հասան երթով՝ Ազատության հրապարակից: «Մեր ռեսուրսը մեր ժողովուրդն է», «Զավթիչը նախագահ չի», «Ձեզ սնողները մեզ պատասխան են տալու» գրությամբ պաստառները ձեռքերին՝ նրանք քայլերթ անցկացրին Հյուսիսային պողոտայում եւ քաղաքացիներին կոչ արեցին միանալ իրենց:
Շարժման նախաձեռնող խմբի անդամներից Արթուր Մովսիսյանի խոսքով՝ «Ոտքի, Հայաստանին» միանալով իրենք ցանկանում են օրինակ ծառայել այլ խնդիրների դեմ պայքարող մյուս նախաձեռնություններին։
«Մեր նպատակն է, որ բոլորս միանանք իրար, մի ճակատ կազմենք եւ հեռացնենք ռեժիմին: Այսօր էլեկտրաէներգիայի թանկացումից բացի էլի խնդիրներ կան, առանձին խմբերը ոչ մի բան չեն կարող անել: Մյուսներին էլ կոչ ենք անում միանալ ոչ թե մեզ, այլ մեկ գաղափարի շուրջ եւ իշխանափոխություն անել»,- NEWS.am-ին ասաց Արթուր Մովսիսյանը:
Արթուր Մովսիսյանը տեղեկացրեց, որ առաջիկայում եւս իրենք ակցիաներ կանցկացնեն, որոնց մասին հայտարարություն կտարածեն: