Թուրքիայի եւ Ադրբեջանի միջեւ սերտ ռազմական համագործակցությունը նորություն չէ. դրա նոր պայմանագրային-իրավական տեսքը սկզբունքայնորեն ոչինչ չի փոխի: Այս մասին NEWS.am-ի թղթակցի հետ զրույցում հայտնեց Հայաստանի պաշտպանության նախարարի խորհրդական, ռազմական փորձագետ Դավիթ Ջամալյանը՝ անդրադառնալով ադրբեջանցի փորձագետ Ուզեիր Ջաֆարովի կարծիքին այն մասին, թե Ադրբեջանի, Վրաստանի եւ Թուրքիայի պաշտպանության նախարարների եռակողմ հանդիպումը հնարավոր է մեկնաբանել որպես ՀԱՊԿ օրինակով կառույցի ստեղծման նախնական փուլ:
Ջամալյանի խոսքով՝ վերջին ժամանակներում Թուրքիայի եւ Ադրբեջանի միջեւ միությունն առավել ինտենսիվ բնույթ է կրում: «Մենք պարզապես ականատես ենք դառնում արդեն գոյություն ունեցող իրողությունների նոր փաստերին: Հայաստանի Պաշտպանության նախարարությունն ու ռազմա-քաղաքական ղեկավարությունն ուշադիր հետեւում են երկրի շուրջ տիրող իրավիճակին եւ համապատասխան եզրակացություններ են կատարում: Մենք խուճապի համար որեւէ պատճառ չունենք, մեզ համար սա սովորական երեւույթ է: Մենք տեղյակ ենք բոլոր այդ իրադարձություններից եւ պետք է հետեւողականորեն ամրապնդենք մեր երկրի պաշտպանական հնարավորությունները»,- ընդգծեց Դավիթ Ջամալյանը:
Ըստ նրա, պետք չէ ուղիղ զուգահեռներ անցկացնել Ադրբեջանի, Թուրքիայի եւ Վրաստանի ռազմական համագործակցության եւ ՀԱՊԿ-ի միջեւ: «Սա ադրբեջանցի փորձագետի սուբյեկտիվ կարծիքն է»,- նշեց փորձագետը:
Ինչ վերաբերում է Վրաստանին. նրա խոսքով, Թբիլիսին իր արտաքին քաղաքականությունն է կառուցում՝ ըստ բազմավեկտոր տրամաբանության: «Վրաստանը փորձում է առավելագույնս ինտեգրվել տարածաշրջանային նախագծերին: Սկզբունքայնորեն մենք չենք կարող բացառել, որ նման սերտ դինամիկ հարաբերություններ Վրաստանը կփորձի կառուցել Ադրբեջանի եւ Թուրքիայի հետ միասին»,- եզրափակեց փորձագետը:
Հիշեցնենք, որ Նախիջեւանում օգոստոսի 19-ին կայացել է Ադրբեջանի, Թուրքիայի եւ Վրաստանի ուժային կառույցների ղեկավարների՝ Զաքիր Հասանովի, Իսմեթ Յըլմազի եւ Իրակլի Ալասանիայի հանդիպումը: