Ուկրաինայի Դոնեցկի եւ Լուգանսկի շրջաններում ռազմական գործողությունների հետեւանքով ենթակառուցվածքներին 440 մլն դոլարի վնաս է հասցվել: Ընդ որում, բախումները, բյուրոկրատիան եւ միջոցների անբավարարությունը խանգարում են բնակչությանը մարդասիրական օգնություն ցուցաբերելուն: Ըստ ԻՏԱՌ ՏԱՍՍ-ի, այս մասին ասվում է ՄԱԿ-ի Մարդասիրական հարցերի համակարգման վարչության հաշվետվությունում:

ՄԱԿ-ի գնահատմամբ՝ գնդակոծությունների եւ ռմբակոծությունների արդյունքում շուրջ 2.000 օբյեկտ է վնասվել՝ ներառյալ 659 հասարակական շինություն, 1.230 մասնավոր տուն եւ 178 գրասենյակ: Դոնեցկում մարտական գործողությունների պատճառով փակվել է ձեռնարկությունների ավելի քան 70 տոկոսը, ընդ որում, դրանց վերագործարկումը, առաջին հերքին՝ հանքերի, լուրջ խնդիրներ է առաջացնելու: Հակամարտության շրջաններում մարդկանց աշխատավարձ եւ կենսաթոշակ չեն վճարում, իսկ բանկերը միայն մասամբ են աշխատում:

ՄԱԿ-ի գնահատականների համաձայն, Ուկրաինայից հարկադրաբար տեղահանվել է 275.500 մարդ: Եվս 341 հազարը փախել են հարեւան երկրներ, նրանցից 300 հազարը՝ Ռուսաստան: Զեկույցի համաձայն, սեպտեմբերի 16-ի դրությամբ հակամարտության զոհ է դարձել առնվազն 3.219 մարդ, այդ թվում՝ 33 երեխա, 8.198 մարդ վիրավորվել է: Փաստաթուղթը, միաժամանակ, ընդգծում է, որ այս թվերը, հնարավոր է, չափազանց իջեցված են: