«Բարգավաճ Հայաստան» կուսակցությունից հաստատեցին կիրակի օրը կայացած խնջույքի մասին լուրը: ԲՀԿ մամուլի խոսնակ Վահան Բաբայանը NEWS.am-ի թղթակցի հետ զրույցում ասաց, որ իսկապես կիրակի օրը ԲՀԿ-ականները հավաքվել են Աբովյանի «Լճեր» ռեստորանում, հավաքին հրավիրված են եղել ԲՀԿ անդամներ Տիգրան Ուրիխանյանը, Աբրահամ Մանուկյանը, ովքեր սակայն չեն մասնակցել:
Հավաքին հրավիրված է եղել եւ մասնակցել է Եվրոպական խորհրդարանի փոխնախագահ Ռիշարդ Չարնեցկին: Ի դեպ, Տիգրան Ուրիխանյանը հրաժարվել էր ԲՀԿ մամուլի խոսնակի պաշտոնից, ինչպես նաեւ վերջերս տեղեկություններ են տարածվել, որ նա նախաձեռնել է «Քաղաքացիական շտաբ» անունով կազմակերպության ստեղծմանը:
Նշենք, որ NewsBook-ի տեղեկություններով` անցած կիրակի օրը ԲՀԿ քաղաքական խորհրդի նախագահի տեղակալ Վարդան Վարդանյանին պատկանող «Լճեր» ռեստորանային համալիրում ԲՀԿ խմբակցությունը խնջույք է կազմակերպել: Խնջույքին մասնակցել են խմբակցության բոլոր այն պատգամավորները, ովքեր կուսակցությունից հեռանալու դիմում չեն ներկայացրել` բացառությամբ Տիգրան Ուրիխանյանի և Աբրահամ Մանուկյանի:
Ի դեպ, ԲՀԿ խմբակցության խնջույքին մասնակցել է նաև հենց նույն օրը Երևան ժամանած Եվրոպական խորհրդարանի փոխնախագահ Ռիշարդ Չարնեցկին: Վերջինիս իրենց խնջույքին հրավիրել է Նաիրա Զոհրաբյանը, ով հրաշալի հարաբերություններ ունի Չարնեցկու հետ: Ի դեպ, Չարնեցկին Եվրոպայի պահպանողականների և ռեֆորմիստների դաշինքի անդամ է, իսկ «Բարգավաճ Հայաստան» կուսակցությունն այդ դաշինքի անդամ կուսակցություն է: