Կառավարությունն անորոշ եւ խուսափողական եզրակացություն է պատրաստել ԱԺ «Ժառանգություն» խմբակցության օրենսդրական նախաձեռնության վերաբերյալ, որով առաջարկվում է հունիսի 29-ը նշել որպես «Անհայտ կորած ազատամարտիկի հիշատակի օր»։
«ՀՀ օրենքով ամրագված կարգով նշվում է Երկրապահի օրը` մայիսի 8-ը: Սակայն անհայտ կորած ազատամարտիկներին հարկավոր է այլ կարգավիճակով դասակարգել, քանի որ նրանց կարգավիճակը, ըստ էության, տարբերվում է կենդանի կամ զոհված ազատամարտիկների կարգավիճակից, հետեւաբար նաեւ սխալ է նույնացումը հայրենիքի պաշտպանության համար նահատակված կամ մահացած զինվորների կարգավիճակի հետ: Անհրաժեշտ է ՀՀ օրենսդրությամբ ու ելնելով անհայտ կորած զինվորների վերաբերյալ Ժնեւյան կոնվենցիայի հիմնադրույթներից` «անհայտ կորած ազատամարտիկի» կարգավիճակին համապատասխան հիշատակի օր ամրագրել «ՀՀ տոների եւ հիշատակի օրերի մասին» ՀՀ օրենքում»,- կառավարությանն ուղղված նամակում նշել են «Ժառանգություն» խմբակցության անդամները։
Ի պատասխան՝ կառավարությունը նշել է, որ մշակվել է տոների եւ հիշատակի օրերի մասին օրենքի նոր նախագիծ ու «Ժառանգության» անդամներին խորհուրդ է տվել ձեռնպահ մնալ ներկայացված նախագծի քննարկումից եւ դրան անդրադառնալ կառավարության կողմից ներկայացվելիք նախագծի քննարկումների համատեքստում: