Հայաստանում դեռեւս 3300 փախստական ընտանիք բնակարանի կարիք ունի: Այս մասին ՄԱԿ-ի փախստականների գծով գերագույն հանձնակատարի երեւանյան գրասենյակի ղեկավար Դամթյու Դեսալեյնեի հետ հանդիպման ժամանակ ասել է ՀՀ Ազգային ժողովի նախագահ Հովիկ Աբրահամյանը: Նա կարեւորել է Ադրբեջանից հայ փախստականների եւ իրաքահայ փախստականների նկատմամբ ցուցաբերված եւ շարունակվող աջակցությունը:
Ինչպես NEWS.am-ը տեղեկանում է ԱԺ մամուլի ծառայությունից, ՀՀ Ազգային ժողովի նախագահը մտահոգիչ է համարել մինչեւ օրս ԼՂ-ում փախստականների անտեսվածության հարցը ՄԱԿ-ի, եւ մասնավորապես, ՄԱԿ-ի փախստականների գծով գերագույն հանձնակատարի գրասենյակի կողմից, որը լիազորված է իր մանդատով օժանդակություն ցուցաբերել փախստականներին` առանց սպասելու հակամարտությունների քաղաքական լուծումներին:
Հ. Աբրահամյանն առաջարկել է Ազգային ժողովի հետ իրականացնել տեխնիկական աջակցության ծրագիր, հատկապես որ խորհրդարանն ավելի լայն հնարավորություն ունի անդրադառնալ հասարակության, այդ թվում եւ փախստականների խնդիրներին:
