![](img/news/27/48/06/default.jpg)
«Վիվասել ՄՏՍ»-ը կարողացել է լուծել սահմանամերձ շրջաններում որակյալ կապի հարցը։ Այս մասին հուլիսի 1-ին՝ ընկերության 10-ամյակին նվիրված մամուլի ասուլիսի ժամանակ, լրագրողներին հայտարարեց ընկերության գլխավոր տնօրեն Ռալֆ Յիրիկյան՝ պատասխանելով NEWS.am-ի թղթակցի հարցին։
«Ուղիղ 10 տարի առաջ՝ 2005թ. հուլիսի 1-ին, մենք շուկա մտանք։ Խնդիրները շատ էին, դրանց թվում՝ սահմանամերձ շրջանների կապը։ Ինձ եւ մեր բոլոր աշխատակիցների համար շատ տհաճ էր տեսնել, որ սահմանին մենք վատ կապ ունենք, եւ որ այնտեղ բացակայում է հայկական կապի օպերատորը։ Տարիների ընթացքում մենք ոչ միայն լավացրեցինք ծածկույթը, այլ տարածեցինք հարեւան երկրների սահմանից մի քանի կմ այն կողմ։ Նաեւ այն պատճառով, որ որոշ այդ տարածքներում ապրում են մեր հայրենակիցները, եւ նրանք ցանկանում են օգտվել հայկական բջջային օպերատորի ծառայություններից։ Մենք կարողացել ենք դա անել։ Դա առաջ բերեց հարեւան երկրների օպերատորների դժգոհությունը։ Դրան ի պատասխան՝ ընկերությունը նշեց, որ այդ դեպքում սահմանից պետք է հեռանալ երկուստեք։ Մենք ասացինք՝ դուք առաջինն եք առաջ եկել, ուրեմն մենք չէ, որ պետք է առաջինը հետ քաշվենք»,-ասաց Յիրիկյանը եւ նշեց, որ ընկերությունը առաջվա պես սահմանի 100 տոկոսանոց ծածկույթ կապահովի։
Ներկայումս «Վիվասել-ՄՏՍ»-ը Հայաստանում զբաղեցնում է հեռահաղորդակցման շուկայի 60 տոկոսից ավելին, ինչը նշանակում է 2 մլն բաժանորդ։