ԱԻՄ առաջնորդ Պարույր Հայրիկյանի նախաձեռնած քաղաքական ուժերի հանդիպումները շարունակվում են, նախորդ անգամ հանդիպել են մոտ մեկ շաբաթ առաջ: Այս մասին NEWS.am-ի թղթակցի հետ զրույցում ասաց Պարույր Հայրիկյանը:
Նա նշեց, որ առայժմ հաջորդ հանդիպումը չի նշանակվել, չգիտեն՝ երբ կլինի: «Խորհրդատվական հանդիպումներ են, մենք թիմ ձեւավորելու ակնկալիք չունենք, նման խնդիր չենք դրել մեր առաջ: Վերջին դեպքերի հետ կապված էլ բոլորիս դիրքորոշումը կարծես նույնն է»,-ասաց Հայրիկյանը՝ հավելելով, որ հանդիպումներին մասնակցում է ԱԻՄ-ը, «Ժառանգությունը», Պահպանողական եւ «Ժողովրդավարական հայրենիք կուսակցությունները:
Ի դեպ, Հայրիկյանը վերջերս է վերադարձել արտերկրից, գնացել էր Բրյուսել ստուգման, արտասահմանցի բժիշկները հայտնեցին, որ նյարդի վերականգնում ավարտվել է, պետք է շարունակել բուժումները, դրանից այն կողմ չեն կարող վերականգնել նյարդը, իսկ եթե վիճակը վատանա, անհարժեշտ կլինի վիրահատություն անել, ինչն այնքան էլ Հայրիկյանի սրտով չէ:
Հիշեցնենք, որ Տպագրիչների 9 հասցում 2013թ. հունվարի 31-ին, ժամը 23.30-ին նախագահի թեկնածու, ԱԻՄ նախագահՊարույր Հայրիկյանի դեմ մահափորձ էր կատարվել իր իսկ տան դիմաց: Օրեր անց ձերբակալվել էր նախագահի մեկ այլ թեկնածու Վարդան Սեդրակյանը, ում 2013թ. սեպտեմբերին Կենտրոն եւ Նորք Մարաշ ընդհանուր իրավասության դատարանը դատապարտել էր 14 տարվա ազատազրկման: