Թուրք զինվորականները կշարունակեն նպաստել Լիբանանում ՄԱԿ-ի Ժամանակավոր ուժերի խաղաղարար առաքելության գործողություններին: Համապատասխան որոշումն ընդունել է Թուրքիայի խորհրդարանը՝ իր զինված ուժերի մանդատը երկարացնելով եւս մեկ տարով:
Գործող մանդատն ավարտվում է սեպտեմբերի 5-ին: Լիբանանում ՄԱԿ-ի Ժամանակավոր ուժերի խաղաղարար առաքելության շրջանակում Ռազմածովային ուժերի առաքելության կազմում թուրքական ռազմանավ է ընդգրկված: Ընդհանուր առմամբ, Լիբանանում 38 պետություններից ավելի քան 11 հազար խաղաղարար կա:
ՏԱՍՍ-ի փոխանցմամբ, ՄԱԿ-ը Լիբանանում խաղաղարար առաքելության մասին առաջին բանաձեւն ընդունել է 1978 թվականին: Զինվորականներ են տեղակայված Լիբանանի հարավում՝ Իսրայելի հետ սահմանին: Նրանց խնդիրների մեջ է մտնում լիբանանա-իսրայելական սահմանին խաղաղության պահպանումը, «Հըզբալլահ» խմբավորման զինյալների գործողություններին խոչընդոտելը: