Ավետիսյանների սպանության գործով տուժողի իրավահաջորդի ներկայացուցիչները միջնորդություն են ներկայացրել՝ դատահոգեբանական-հոգեբուժական փորձաքննության ենթարկելու գործով մեղադրյալ Վալերի Պերմյակովին: Այս մասին այսօր՝ օգոստոսի 17-ին, լրագրողների հետ հանդիպմանն ասաց տուժշողի իրավահաջորդի ներկայացուցիչ Լուսինե Սահակյանը՝ նշելով, որ հույս չունեն՝ հայկական կողմն իրական եզրակացություն կտա:
«Ռուսական ռազմաբազայում տեղի ունեցած դատավարության ժամանակ ակնհայտ էր, որ Պերմյակովը խնդիրներ ունի, մինչդեռ փորձաքննության եզրակացության համաձայն՝ նա լիովին առողջ է: Այս եզրակացությունը, սակայն, իրականության չի կարող համապատասխանել. անձը չի կարող իր սեփական դատին քնել-զարթնել, ամբողջ ընթացքում մեջքով նստել դահլիճին եւ ոչ մի անգամ չշրջվել»,- ասաց Լուսինե Սահակյանը:
Փաստաբանի խոսքով՝ եթե Պերմյակովն ագրեսիվ չի եղել, ուրեմն լուրջ դրդապատճառներ է ունեցել 7 անձի սպանելու համար: Այս վարկածի հաստատման դեպքում հայկական կողմը պետք է պարզի այդ դրդապատճառները:
Փաստաբան Երվանդ Վարոսյանի համար էլ կասկածելի էր Պերմյակովի իներտությունը:
Նշենք, որ օգոստոսի 12-ին ռուսական կողմը դասալքության համար Պերմյակովին դատապարտել է 10 տարվա ազատազրկման:
Հունվարի 12-ին տեղի ունեցած Ավետիսյանների սպանության գործը քննելու է հայկական կողմը: Նյութերն արդեն տրամադրվել են Հայաստանի Քննչական կոմիտեին: