Մարդու իրավունքների եվրոպական դատարանում քննվող «Փերինչեքն ընդդեմ Շվեյցարիայի» դատական գործով դատավճռից Հայաստանի միակ ակնկալիքն այն է, որ դրանում չլինի Հայոց ցեղասպանության փաստը կասկածի տակ դնող ձեւակերպում: Այս մասին լրագրողների հետ զրույցում ասել է ՀՀ գլխավոր դատախազ, ՄԻԵԴ-ում Հայաստանի կառավարության լիազոր ներկայացուցիչ Գեւորգ Կոստանյանը:
«Մեր հիմնական եւ միակ ակնկալիքը այս դատավարության արդյունքից այն է, որ վճռում չլինի այնպիսի ձեւակերպում, որը ոչ միայն կասկածի տակ կդնի Հայոց ցեղասպանության փաստը, այլեւ քննարկման առարկա կդարձնի, առավել եւս, երբեւէ կհամեմատի այն այլ ցեղասպանությունների հետ»,- ասել է նա:
Հիշեցնենք, որ 2008թ. Շվեյցարիայի դատարաններից մեկը դատապարտել էր Թուրքիայի աշխատավորական կուսակցության առաջնորդ Դողու Փերինչեքին Հայոց ցեղասպանությունը ժխտելու համար։ Փերինչեքը դիմել էր ՄԻԵԴ, եւ անցյալ տարվա դեկտեմբերին Եվրոպական դատարանը բավարարել էր Շվեյցարիայի դեմ նրա հայցը։
Շվեյցարիան բողոքարկել է ՄԻԵԴ-ի որոշումը։ Ընթացիկ տարվա հունվարի 28-ին «Դողու Փերինչեքն ընդդեմ Շվեյցարիայի» գործով դատական նիստ է տեղի ունեցել։ Հայաստանը գործում ներգրավված է (Perincek v. Switzerland, App. no. 27510/08) որպես երրորդ կողմ։ ՄԻԵԴ-ում մեր երկրի իրավունքները պաշտպանել են հայտնի փաստաբաններ Ջեֆրի Ռոբերտսոնը, Ամալ Ռամզի Կլունին, Թոբի Քոլիսը:
Այս գործով դատավճիռը կհրապարակի հոկտեմբերի 15-ին:
