Հայաստանի վարչապետ Հովիկ Աբրահամյանն ու Իրանի փոխնախագահ Էսհաղ Ջահանգիրին Երեւանում կայացած հանդիպմանը տարբեր ոլորտներում համագործակցության հարցերի լայն շրջանակ են քննարկել:
Ճեպազրույցում Հովիկ Աբրահամյանը տեղեկացրեց, որ հանդիպումն անցել է բարեկամական եւ ջերմ մթնոլորտում, կողմերը հաստատել են հարաբերությունները խորացնելու պատրաստակամությունը, եւ այս այցը լրացուցիչ խթան կհանդիսանա:
Կողմերն ամփոփել են Հայաստանի վարչապետի՝ Իրան կատարած այցի ընթացքում ձեռք բերված պայմանավորվածությունների իրականացման արդյունքները, գոհունակություն հայտնել Իրանի միջուկային ծրագրի շուրջ բանակցությունների արդյունքներից՝ նշելով, որ դրանք միտված էին տարածաշրջանում կայունության հաստատմանն ու համագործակցության նոր հեռանկարների ստեղծմանը:
Այդ համատեքստում քննարկվել են էներգետիկայի (Իրան-Հայաստանի էլեկտրահաղորդման երրորդ գծի շինարարություն), տրանսպորտային ենթակառուցվածքների (Հյուսիս-Հարավ մայրուղու շինարարություն), գյուղատնտեսության, մշակույթի ոլորտներում համագործակցության հարցեր: Քննարկվել են նաեւ Իրանի եւ Հայաստանի հարաբերությունները՝ ԵՏՄ-ին մեր երկրի անդամակցության համատեքստում: Իրանական կողմը ԵՏՄ-ի հետ երկխոսություն սկսելու պատրաստակամություն է հայտնել:
Հոկտեմբերի 15-ին Երեւանում հայ-իրանական գործարար համաժողով կկայանա, որին շուրջ 300 գործարար կմասնակցի:
