Առաջիկա քաղաքական տարում ավելի ակնհայտ կլինեն այս կամ այն ուժերի տրամադրությունները 2012թ. կայանալիք ընտրություններից առաջ, NEWS.am-ի թղթակցի հետ զրույցում հայտարարել է «Ժառանգություն» խմբակցության ղեկավար Ստեփան Սաֆարյանը:
Նա ընդգծել է, թե Հայաստանի քաղաքական ուժերը արդեն ներգրավված են աննախադեպ նախընտրական քարոզարշավում: «Առայժմ վաղ է խոսել նոր ուժերի ստեղծման մասին, քանի որ քաղաքական դաշտը լավ խցանված է: Այլ հարց է, որ քաղաքական աղբարկղը նետված շատ ուժեր կփորձեն ակտիվանալ»,- ասել է պատգամավորը՝ նշելով, որ այդ ուժերը հիմնականում նրանք են, ովքեր քաղաքական ծաղրածուների կամ գործ տվողների դեր են խաղում, կամ էլ հյուր են մեծ քաղաքականության մեջ:
Նա հնարավոր է համարել հիմնական քաղաքական խաղացողների շարքերում վերադասավորումները ինչպես կառավարող, այնպես էլ ընդդիմադիր դաշտում: Ընդդիմադիր գործիչը հնարավոր է համարել նաեւ ընտրությունների մոտենալուն զուգահեռ, որոշ ուժերի ընդդիմադիր կեցվածքը, երբ նրանք պարզեն, որ ապագա խորհրդարանում իրենց համար տեղ չկա:
«Եթե Հայաստանում արդար խորհրդարանական ընտրություններ կայանան, Ազգային Ժողովի քաղաքական պատկերը կփոխվի, եւ ներկայիս իշխանամետ ուժերի մի մասը պարզապես չի անցնի խորհրդարան»,- հավաստիացրել է պատգամավորը:
Փոփոխություններ կանխատեսելով կառավարող կոալիցիայի շարքերում, Սաֆարյանը նշել է, որ խորհրդարանական ընտրություններին նրանց միջեւ որոշակի հակասություններ կծագեն վարչական ռեսուրսի օգտագործման ուղղությամբ: Առաջիկա ընտրություններում ՀՀԿ-ն որոշ փոփոխություններ կմտցնի գործընկերների հետ հարաբերություններում: «Ես վստահ եմ, որ 5-րդ գումարման խորհրդարանում «Բարգավաճ Հայաստանն» այլեւս ներկայացված չի լինի նման մեծ կազմով: ՀՀԿ-ն կանի ամեն ինչ, որ կախված չլինի ԲՀԿ-ից»,- նշել է Սաֆարյանը: