Գործող Սահմանադրությունն ուղղակի սպառնալիք է ՀՀ անվտանգությանը: Այսօր՝ նոյեմբերի 24-ին, Լոռու մարզի Հաղպատ գյուղում «Այո»-ի եւ «Ոչ»-ի ռեալիթի շոուի շրջանակում նման կարծիք է հայտնել ԱԺ ՀՀԿ խմբակցության պատգամավոր Սամվել Ֆարմանյանը:
«Մեր հարգարժան ընդդիմադիր գործիչներն անտեսում են Հանրապետության անվտանգության ապահովման մասին հարցը: Գործող Սահմանադրությունը հղի է այնպիսի ականով, որը սպառնալիք է մեր անվտանգությանը: Ներկայիս Սահմանադրությունն ասում է՝ մենք ընտրում ենք ՀՀ նախագահ, որն օժտված է Գերագույն գլխավոր հրամանատարի պարտականություններով, ապահովում է երկրի անվտանգությունը եւ խոշոր հաշվով պատասխանատու է խաղաղության համար: Նույն այս Սահմանադրությամբ խորհրդարանում մեծամասնություն ստացած քաղաքական ուժը ղեկավարում է կառավարությունը: Պատկերացնենք մի իրավիճակ, երբ երկրի նախագահ է դառնում Նարեկ Այվազյանը, իսկ խորհրդարանական ընտրություններում հաղթում է «Ժառանգությունը»: Այստեղ հնարավոր է առաջանա քաոսային վիճակ»,- ասել է Սամվել Ֆարմանյանը:
ՀՀԿ-ական պատգամավորի խոսքով՝ հենց այդ պատճառով էլ իրենք առաջարկում են կառավարման խորհրդարանական համակարգ, որի շնորհիվ գերագույն գլխավոր հրամանատարի պարտականությունները դրվում են վարչապետի վրա:
Հիշեցնենք, որ Սահմանադրական փոփոխությունների հանրաքվեն կանցկացվի դեկտեմբերի վեցին:
