Գյումրիում Ավետիսյանների ընտանիքի սպանությունից հետո քաղաքում տեղի ունեցած բողոքի ակցիայի մասնակիցների եւ ոստիկանների միջեւ բախումների գործով նշանակված փորձաքննության եզրակացությունը ստացվել է: Այս մասին NEWS.am-ի թղթակցի հետ զրույցում ասաց գործով մեղադրյալներից Մնացական Ալեքսանյանի փաստաբան Հայկ Հարությունյանը:
«Քարեր էին ուղարկել փորձաքննության՝ պարզելու համար, թե ինչ քարեր են, որտեղից են բերել: Փորձագետներն էլ տվել են եզրակացություն, որ հնարավոր չէ պարզել, թե քարերը որտեղից են»,- ասաց Հայկ Հարությունյանը:
Նախաքննությունը շարունակվում է: Նշենք, որ մեղադրյալների թիվը պաշտոնապես չեն հայտնում: NEWS.am-ի տեղեկություններով, սակայն, նրանց թիվը 19-ն է: Ի դեպ, մեղադրյալներից 3-ի անունն է հայտնի միայն՝ Մնացական Ալեքսանյան, Անուշավան Հարությունյան եւ անչափահաս Սամվել Սարգսյան:
Հիշեցնենք, որ բախումները տեղի էին ունեցել 2015թ. հունվարի 15-ին Գյումրիում ՌԴ հյուպատոսարանի շենքի առջեւ ոստիկանների եւ ցուցարարների միջեւ: Բախումներից հետո Գյումրիի հիվանդանոց էր դիմել 33 անձ, որոնցից 23-ը ոստիկան:
Բողոքի ակցիայի մասնակիցները պահանջում էին Հայաստանին հանձնել Գյումրիում հունվարի 12-ին Ավետիսյանների ընտանիքի 7 անդամներին սպանելու համար մեղադրվող Վալերի Պերմյակովին:
