Գյումրիում Ավետիսյանների սպանության մեջ մեղադրվող Վալերի Պերմյակովի գործով դատավարությունն արտագնա նիստով անցկացնելը չի կարող որեւէ ազդեցություն ունենալ դատաքննության հրապարակայնության վրա: Այս մասին այսօր՝ դեկտեմբերի 11-ին, լրագրողների հետ հանդիպմանն ասաց ՀՀ գլխավոր դատախազ Գեւորգ Կոստանյանը:
«Արտագնա նիստ հրավիրելու բոլոր գործնական եւ իրավական հիմքերը մենք ունենք: Այսօր էլ բազմաթիվ նիստեր ՀՀ տարածքում հրավիրվում եւ անցկացվում են զորամասերում: Դա երբեք չի կարելի դիտել որպես հրապարակայնությունը խոընդոտող հանգամանք»,- ասաց Կոստանյանը:
Գեւորգ Կոստանյանի խոսքով՝ անկախ նրանից, թե որ դատարանում է ընթանում դատաքննությունը, հրապարակայնությունը նույն կերպ է երաշխավորում՝ դահլիճի չափերով պայմանավորվող ներկաների քանակությամբ եւ լրատվամիջոցների ներկայությամբ:
«Դատարանը պետք է որոշում կայացնի լրատվամիջոցների մասնակցությունը թույլ տալու կամ թույլ չտալու կապակցությամբ»,- ասաց դատախազը:
Նշենք, որ Պերմյակովի գործով դատական առաջին նիստը կկայանա դեկտեմբերի 18-ին: Նիստը տեղի կունենա Գյումրիում տեղակայված ռուսական 102-րդ ռազմաբազայում:
