Գյումրիում Ավետիսյան ընտանիքի սպանության գործով դեկտեմբերի 18-ի դատավարության հետ կապված արդեն տեխնիկական խնդիրներ են ի հայտ եկել:
Հիշեցնենք, որ նախատեսված է դատավարությունն անցկացնել կայազորային դատարանում` Գյումրիում ռուսաստանյան 102-րդ ռազմաբազայի տարածքում: Այդ դատարանում արդեն տեղի է ունեցել դատական նիստ նույն մեղադրվող, ռուսաստանցի զինվորական Վալերի Պերմյակովի գործով: Այն ժամանակ լսվում էր դասալքության եւ տաբելային զենքի գողության վերաբերյալ գործը, որը հարուցել էր ռուսական կողմը:
Ավետիսյանների ընտանիքի սպանության գործը քննելու է Շիրակի մարզի ընդհանուր իրավասության դատարանը, իսկ դատը բազայի տարածքում անցկացնելու որոշումն ընդունվել է անվտանգության նկառաումներով:
Սակայն այդ հանգամանքն արդեն խնդիրներ է առաջ բերել: Հաշվի առնելով, որ բազան ռեժիմային օբյեկտ է, որտեղ այցելելու համար համապատասխան թույլտվություն է անհրաժեշտ, NEWS.am-ի թղթակիցները դիմել են ռուսական կողմին, որից պատասխան է ստացվել, թե պեռք է դիմել դատարանին, որը բազայի ղեկավարությանը կհանձնի լրատվամիջոցների ներկայացուցիչների անունները:
Շիրակի մարզի ընդհանուր իրավասության դատարանում, ի զարմանս լրագրողների, միանգամից երեք բավականին հակասական պատասխան հնչեցվեց, որոնք բոլորովին լույս չսփռեցին իրավիճակի վրա:
Արդյունքում հարցը օդում կախված կմնա` սպառնալով ավարտվել մամուլին դատարան թողնելուց հրաժարումով:
Այս դատավարությունը լրատվամիջոցներով լուսաբանելու հարցում իրավասու մարմինների շահագրգռվածության բացակայությունն առնվազն զարմանք է հարուցում, եթե հաշվի առնենք այն ոչ փոքր ջանքերը, որոնք գործադրվել են, որպեսզի Վալերի Պերմյակովը կանգնի հայկական արդարադատության առաջ: