Գյումրիում ռուսական ռազմաբազայի տարածքում գտնվող դատարանում այսօր՝ հունվարի 29-ին, շարունակվում է Ավետիսյանների ընտանիքի սպանության գործով հերթական դատական նիստը:
Այսօր ցուցմունք են տալիս տուժողի իրավահաջորդները: Ավետիսյանների դուստր Լուսինե Ավետիսյանը միջնորդեց, որ հրապարակվի իր նախաքննական ցուցմունքը:
Լուսինե Ավետիսյանն իր ցուցմունքում պատմել է, որ ամեն առավոտ բջջային հեռախոսով զրուցել է ընտանիքի անդամների հետ, սակայն 2015թ. հունվարի 12-ին զանգահարել է հորը, ապա եղբորը, սակայն ոչ ոք զանգերին չի պատասխանել: Ավետիսյանների դուստրը դաժան սպանության մասին իմացել է հեռուստատեսությամբ: Լուսինե Ավետիսյանը պատմել է նաեւ, որ ռուսական ռազմաբազայի հետ որեւէ առնչություն չեն ունեցել, գործով մեղադրյալին չի ճանաչել, միեւնույն ժամանակ կարծիք է հայտնել, թե նա միայնակ գործել չէր կարող:
Լուսինե Ավետիսյանի ամուսինը՝ Եգոր Ադամյանը, նույնպես միջնորդել է ընթերցել իր նախաքննական ցուցմունքը, որի համաձայն՝ ինքը սպանության մասին իմացել է կնոջ հարազատներից մեկից: Ավետիսյանների մյուս դստեր՝ Անահիտ Կոշտոյանի նախաքննական ցուցմունքի համաձայն՝ ինքը մոր հետ խոսել է դեպքի նախօրեին:
«Այդ օրը զանգեցի, մայրս չպատասխանեց, հետո ցերեկը մեր տուն եկավ քույրս Երեւանից ու պատմեց... Ընտանիքս որեւէ մեկի հետ թշնամություն չի ունեցել»,- հավելել է Անահիտ Կոշտոյանը:
Դատական նիստը շարունակվում է:
Նախորդ նիստի ժամանակ ամբաստանյալ Վալերի Պերմյակովն իրեն մեղավոր էր ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանության, ավազակության և Հայաստանի պետական սահմանը հատելու փորձի:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին։