Գյումրիում սպանված Ավետիսյանների հետ նույն բակում բնակվող նրանց ազգականուհու` Կարինե Ավետիսյանի, նախաքննական եւ դատարանում տված ցուցմունքները հակասում են իրար: Տուժողի իրավահաջորդների ներկայացուցիչները այսօր` հունվարի 29-ին, ընթացող դատական նիստին առնվազն 2 այդպիսի հակասություն մատնացույց արեցին: Մասնավորապես` փաստաբան Երեմ Սարգսյանը նկատեց, որ իր նախաքննական ցուցմունքում 2015թ. փետրվարի 6-ին Կարինե Ավետիսյանը ասել է, որ դրսի դռան պտտվող բռնակը միշտ փակ է եղել, բայց ցանկացած մարդ կարող էր պտտելով այն բացել, միչդեռ այսօր դատարանում վկան նշել է, որ այդ բռնակը դժվար է բացվում: Նախաքննական ցուցմունքում վկան նաեւ նշել էր, որ տոնական օրերին դրսի դուռը միշտ բաց է եղել, մինչդեռ այսօր դատարանում ասել է, որ այն փակ է եղել: Վկան նաեւ հակասական ցուցմունք է տվել այն մասին, թե գիշերը «գմփոց» լսելով տնից դուրս գալուց հետո քանի րոպե է դրսում մնացել: Նշենք, որ Կարինե Ավետիսյանի պատմելով ինքը դուրս է եկել, սակայն մութ է եղել, վախեցել է գնալ հորեղբոր որդու տուն, նրանց տան լույսերն անջատված են եղել եւ ինքը որեւէ կասկածելի բան չնկատելով վերադարձել է տուն:
Ավելի վաղ վկայի ցուցմունքներում հակասություններ էր նկատել նաեւ փաստաբան Լուսինե Սահակյանը, մասնավորապես` նախկինում վկան ասել էր, թե դուրս գալով լսել է փոքրիկ Սերյոժայի լացի ձայնը, սակայն դատարնում ասել էր, թե լացի ձայն չի լսել եւ միայն փաստաբանի ճշտող հարցից հետո էր ընդունել, որ լսել է երեխայի լացի ձայնը, սակայն, դա իր մոտ որեւէ կասկած չի առաջացրել:
Նախորդ նիստի ժամանակ ամբաստանյալ Վալերի Պերմյակովն իրեն մեղավոր էր ճանաչել առաջադրված բոլոր մեղադրանքներում՝ առանձնակի դաժանությամբ իրականացված սպանության, ավազակության և Հայաստանի պետական սահմանը հատելու փորձի:
Ավելի վաղ հայտնել էինք, որ Ավետիսյանների ընտանիքի 6 անդամների սպանությունը տեղի է ունեցել 2015թ. հունվարի 12-ին։ Ավետիսյանների ընտանիքից ողջ էր մնացել 6 ամսական Սերյոժա Ավետիսյանը, որը ծանր վնասվածքներով տեղափոխվել էր բժշկական կենտրոն, որտեղ յոթ օր անց մահացել էր:
Ավետիսյանների ընտանիքի 7 անդամի սպանության համար մեղադրվում է Գյումրիի 102-րդ ռուսական ռազմաբազայի ժամկետային զինծառայող Վալերի Պերմյակովը։ Դեպքի առթիվ Հայաստանում հարուցվել էր քրգործ սպանության հատկանիշներով, իսկ ՌԴ-ում՝ դասալքության:
Ռուսական կողմն օգոստոսի 12-ին Պերմյակովին դատապարտել է ազատազրկման 10 տարի ժամկետով:
Հայկական կողմը 2015թ. դեկտեմբերի 18-ից սկսել է դատաքննությունը: Նիստերը տեղի են ունենում ռուսական ռազմաբազայի տարածքում: Դատարանի վճռով նիստն ընթանալու է ուրբաթ օրերին։