Իսրայելի վարչապետ Բենյամին Նեթանյահուն խոստացել է երկրի ցամաքային սահմանի ամբողջ երկայնքով պարիսպ կառուցել ահաբեկչությունից, հանցավորությունից եւ անօրինական ներգաղթից պաշտպանվելու համար:
Որպեսզի օղակը փակվի: Իսրայելին ըստ էության մնացել է պարսպապատել Հորդանանի հետ սահմանը, որտեղ արդեն բաժանարար կառույցներ են կառուցվում:
«Ի վերջո, Իսրայելը, ինչպես տեսնում եմ, բոլոր կողմերից շրջապատված կլինի անվտանգության պարսպով: Ինձ կհարցնեն. «Արդյո՞ք մենք իրականում ամբողջ Իսրայելն ենք շրջապատում պարսպով»: Այո, միանշանակորեն: Այն շրջապատում, որում մենք ենք ապրում, պիտի մեզ պաշտպանենք գիշատիչներից», — ասել է Նեթանյահուն, տեղեկացնում է «ՌԻԱ Նովոստին»:
Նման եղանակով Իսրայելն արդեն պարսպապատել է սահմանները Լիբանանի, Սիրիայի, Եգիպտոսի, Գազայի սեկտորի, մասնավորապես` Հորդանան գետի Արեւմտյան ափի հետ: Անցյալ տարի սկսվել էր Հորդանանի հետ` ամենահանգիստ, բայց ամենախոցելի սահմանի վրա պարսպի կառուցումը: Դրա առաջին` 30 կիլոմետրանոց հատվածը կձգվի իսրայելական հարավային Էյլաթ քաղաքից դեպի հյուսիս` Տիմնա բնակավայր, որտեղ նոր միջազգային օդանավակայանի շինարարություն է սկսվել:
«Մենք մեր երկրի բոլոր սահմանների երկայնքով անվտանգության պարսպի կառուցման բազմամյա ծրագիր ենք նախապատրաստում, որպեսզի մեզ պաշտպանենք Մերձավոր Արեւելքում, ինչպիսին որ այն է այժմ եւ ինչպիսին ակնկալում է լինել… Դրան ի հավելումն, մենք Հուդայում եւ Սամարիայում (Հորդանան գետի Արեւմտյան ափը) անվտանգության պարսպով ներթափանցումը կանխարգելող ծրագիր ենք նախապատրաստում», — նշել է կառավարության ղեկավարը:
«Դա միլիարդավոր շեքելներ արժե, դրանք բազմաթիվ տարիների ծախսեր են, բայց այդ ծրագիրը կիրականացվի հանուն Իսրայելի անվտանգության», — հավելել է նա: