ԱԱԾ կողմից վնասազերծված «Զինված խմբի» գործով կալանավորված, ՀՀ պաշտպանության նախարարի նախկին տեղակալ Վահան Շիրխանյանին այսօր՝ փետրվարի 15-ին, տեղափոխել են քաղաքացիական հիվանդանոց՝ հետազոտության: Այս մասին NEWS.am-ի հետ զրույցում ասաց մեղադրյալի պաշտպան Ստեփան Ոսկանյանը:
«Տեղափոխել են հանրապետական հիվանդանոց, թեեւ մենք միջնորդել էինք, որ հետազոտեն Վլադիմիր ավագյանի անվան բժշկական կենտրոնում, որովհետեւ այնտեղ հետազոտվել է, բոլորը տեղյակ էին»,- ասաց Ստեփան Ոսկանյանը:
Պաշտպանը նշեց, որ ինքը կբողոքարկի, քանի որ հիմքեր ունի կասկածելու, որ այս բժշկական կենտրոնում օբյեկտիվ եզրակացություն չեն տա:
Վահան Շիրխանյանը, փաստաբանի խոսքով, առողջական լուրջ խնդիրներ ունի:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ, նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում «մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք՝ այդ թվում զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել:
ՀՀ ԱԱԾ քննչական վարչությունում հարուցվել է քրեական գործ ՀՀ քրեական օրենսգրքի 223-րդ հոդվածի 1-ի եւ 2-րդ մասերով եւ 235–րդ հոդվածի 3-րդ մասով, այն է՝ Հանցավոր համագործակցություն ստեղծելը եւ դրան մասնակցել եւ Ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը:
