Թուրքական Taraf թերթն իր այսօրվա համարում անդրադարձել է Վանի Աղթամար կղզու Սուրբ Խաչ եկեղեցու վրա խաչ չտեղադրելու խնդրին:
Հետազոտող լրագրող Այշե Հյուրը գրում է. «2005-2007թթ թուրք եւ հայ մասնագետների կողմից վերանորոգված եւ 2007թ –ի մարտի 29-ին էլ, եւ այժմ էլ կրկին լարված վիճակում բացում կատարվող հուշարձան եկեղեցու անհրաժեշտություն հանդիսացող 100 կգ-ոց խաչը Վանի նահանգապետ Մյունուր Քարալօղլույի խոսքով՝ «տեխնիկական եւ բարդ մի գործ լինելու պատճառաբանության» արդյունքում կար հավանականություն, որ հայ համայնքը կբողոքարկի արարողությունը:
«Մի երկիր, ուր շինարարական ֆիրմաները կարողանում են 270-մետրանոց երկնաքերեր կառուցել, մտածում էի, թե ինչպես չի ամաչում նահանգապետը, ով չի կարողանում 100 կգ-ոց մի երկաթյա խաչը ընդամենը 10-15մ բարձրության վրա տեղադրել, ճգնաժամը հաղթահարվեց շրջանի ողջամիտ գործարարների միջամտությամբ եւ խաչը տեղադրվեց, թեպետ ոչ գմբեթում, այնտեղ ուր հայ համայնքի համար ընդունելի էր»:
Ինչպես ավելի վաղ հայտնել էր NEWS.am-ը, սեպտեմբերի 19-ին Վանի Աղթամար կղզու Սուրբ Խաչ եկեղեցում գրեթե հարյուրամյա դադարից հետո պատարագ է մատուցվել: Թուրքական իշխանությունները, սակայն, խաչ չեն տեղադրել եկեղեցու գմբեթին: Խաչը բերվել եւ տեղադրվել է եկեղեցու հարեւանությամբ: Դա պատճառ է դարձել, որ բազմաթիվ հայեր հրաժարվեն այցելել կղզի: Վանի առեւտրա-արդյունաբերական պալատի նախագահ Զահիր Քանդաշօղլուն հայտնել է, որ Վան այցելելու ցանկություն հայտնածների 90 տոկոսը հրաժարվել է իր մտքից՝ խաչը չտեղադրելու որոշումից հետո:
Հատկանշական է, որ հայ լրագրողների մի խումբ պատարագի ժամանակ փայտե խաչեր է բարձրացրել ի նշան բողոքի խաչը չտեղադրելու որոշման դեմ:
Նշենք, որ Աղթամարի Սուրբ Խաչ եկեղեցում ավարտված պատարագին մասնակցել է միայն Պոլսո Հայոց պատրիարքարանը: Հոգեւոր մյուս կենտրոնները` Մայր Աթոռ Սուրբ Էջմիածինը, Երուսաղեմի պատրիարքարանն ու Մեծի Տանն Կիլիկիո կաթողիկոսությունը հրաժարվել են մասնակցել միջոցառմանը: Պատճառը եկեղեցու գմբեթին խաչ չտեղադրելու հանգամանքն է: Հարկ է նշել, որ նույն պատճառով կրոնական արարողությանը հրաժարվել են մասնակցել նաեւ հայ քաղաքացիական հասարակության շատ ներկայացուցիչներ, չնայած նրանց Թուրքիայի վարչապետն անձամբ է հրավիրել պատարագին: Քաղաքացիական հասարակության ներկայացուցիչները հայտարարել են, որ քանի դեռ եկեղեցու գմբեթին խաչ չի տեղադրվել, եկեղեցին վերականգնված համարել չի կարելի:
