Թուրքիայի կողմից Սիրիայի տարածքի գնդակոծությունը շարունակվում է, ասված է ռուսաստանյան Սիրիայի տարածքում պատերազմող կողմերի հաշտեցման կենտրոնի տեղեկատվական բյուլետենում: Տեքստը հրապարակվել է շաբաթ ՌԴ Պաշտպանության նախարարության կայքում:
Շարունակվում է Թուրքիայի տարածքից Սիրիայի տարածքի գնդակոծությունը: Ռուսաստանյան Հաշտեցման կենտրոնը Հալեպի նահանգի բնակիչներից տեղեկություններ է ստացել Դաքնա բնակավայրի շրջանում քրդական ինքնապաշտպանության ջոկատների դիրքերին հրետանային հարվածի մասին:
Գրոհայինները, որոնք իրենց վերագրում են «Ահրար Աշ-Շամ» խմբավորմանը, երկու անգամ համազարկային կրակի ռեակտիվ համակարգերից եւ ականանետերից գնդակոծել են քրդական ջոկատների դիրքերը Հալեպ քաղաքի Շեյխ Մակսուդ թաղամասում:
Ռուսաստանյան Պատերազմող կողմերի հաշտեցման կենտրոնը լրացուցիչ օպերատիվ խումբ է ուղարկել Հալեպում եւ մերձակայքում իրավիճակի մոնիտորինգի համար:
Հիշեցնենք, որ Սիրիայում հրադադարի պայմանավորվածությունը ձեռք էր բերվել փետրվարի 22-ին` Ռուսաստանի եւ ԱՄՆ-ի խորհրդակցությունների ընթացքում: Մոսկվայի եւ Վաշինգթոնի համատեղ հայտարարության համաձայն, հրադադարը որը չի տարածվում ՄԱԿ-ի Անվտանգության խորհրդի կողմից որպես ահաբեկչական ճանաչված «Իսլամական պետություն», «Ջեբհաթ Ան-Նուսրա» եւ այլ խմբավորումների վրա, սկսվել է փետրվարի 27-ին ժամը 00.00-ին:
