Մայիսի 16-ին Վիեննայում Հայաստանի եւ Ադրբեջանի նախագահների հանդիպումից հետո առաջին անգամ այս գիշեր ադրբեջանական կողմը գնդակոծել է Հայաստանի սահմանամերձ Բաղանիս գյուղը: Գնդակոծման հետեւանքով վնասվել են տանիքներ ու պատուհաններ, իսկ էքսկուրսիայից վերադարձող դպրոցականները ստիպված են եղել մոտ 30 րոպե սպասել գյուղի սկզբնամասում՝ անվտանգությունից ելնելով: Գյուղում այս պահին հանգիստ է:
Հունիսի 7-ին հայ-ադրբեջանական սահմանը հատած ադրբեջանցի կնոջ վերաբերյալ տեղեկություններ են հայտնվել ադրբեջանական մամուլում: Մասնավորապես, ադրբեջանական կողմը պնդում է, որ այդ կինը հոգեկան խնդիրներ ունի, հաշվառված է դիսպանսերում, ծնունդով Վրաստանից է, մշտական բնակության վայր չունի, գյուղից գյուղ է անցնում եւ գուշակություն անում: Ադրբեջանական մամուլը հաղորդում է, որ 39-ամյա կինը Գաթիբա է Ալեքպերովան է, մինչդեռ կինը հայկական կողմին ներկայացել է այլ անուն-ազգանունով:
Հունիսի 6-ին Ստեփանակերտում բռնության ենթարկված ընդդիմադիր պատգամավոր Հայկ Խանումյանը համոզված է, որ իր հետ կատարվածն ունի քաղաքական շարժառիթ: NEWS.am-ի հետ զրույցում ընդդիմադիր պատգամավորը նշել է, որ ինքը ճանաչում է իրեն ծեծի ենթարկողներից 7-ին, որոնց անուններն առաջիկայում կներկայացնի ոստիկանություն: Բացի դրանից՝ դեպքի վայրում առկա տեսանկարահանող սարքերը տեսագրել են ամեն ինչ:
Ինչ վերաբերում է օրերս Արցախ վերադարձած Սամվել Բաբայանի այն հայտարարությանը, թե Հայկ Խանումյանը ղալաթ է անում, որ առաջարկում է իրեն պաշտպանության նախարար նշանակել, պատգամավորը պատասխանել է:
Նշենք, որ Հայկ Խանումյանն այսօր դուրս է գրվել հիվանդանոցից:Ծեծի առնչությամբ հարուցված քրեական գործով դեռեւս ոչ ոք չի ձերբակալվել:
Ռուսաստանի հետ հակաօդային պաշտպանության միասնական համակարգ ստեղծելու դեպքում Հայաստանը չի կորցնի իր օդային տարածքի անկախությունը՝ ասել է Շավարշ Քոչարյանը՝ անդրադառնալով ծրագրի առնչությամբ հնչող մտահոգություններին: Ավելին՝ նրա խոսքով՝ այն մեծացնելու է Հայաստանի անվտանգությունը: Ղարաբաղի տարածքում Հայաստան-Ռուսաստան ՀՕՊ համաձայնագիրը չի գործելու:
2015թ. բյուջեի կատարողականի քննարկմանը ընդդիմադիր պատգամավոր Նիկոլ Փաշինյանը բարձրացրել է ռազմարդյունաբերական համալիրի ստեղծման անհրաժեշտության հարցը: Ըստ պատգամավորի, ժամանակն է՝ նրա ձեւակերմամբ, պոմիդորահեն տնտեսությունից անցում կատարել դեպի ռազմական արդյունաբերության:
ԲՀԿ խմբակցության ղեկավար Նաիրա Զոհրաբյանն էլ հիշել է պաշտոնյաների եւ պատգամավորների կեղծ հայտարարագրերի մասին: Մենաշնորհների ու կոռուպցիայի դեմ պայքարը, նրա խոսքով, իրական կլիներ, եթե ստուգեին՝ ինչպես են պաշտոնյաների հարազատները մեկ տարվա ընթացքում միլիոնատեր դառնում:
Ինչպես նախօրեին հայտարարել էր վարչապետ Հովիկ Աբրահամյանը, այսօր աշխատանքից ազատվել է գյուղատնտեսության նախարարության միանգամից երեք փոխնախարար՝ Գառնիկ Պետրոսյանը, Սամվել Գալստյանն ու Գրիշա Բաղիյանը: Նրանց փոխարեն ոչ ոք չի նշանակվելու: Ազատված փոխնախարարների պնդմամբ, իրենք չգիտեն, թե ինչու են զրկվել աշխատանքից: Գրիշա Բաղիյանի խոսքով՝ ինքը որեւէ թերացում չի արել, իսկ 13 տարի նախարարությունում աշխատած Սամվել Գալստյանը չի ցանկացել մեկնաբանել վարչապետի որոշումը, նշել է միայն, որ իր թոշակի անցնելու ժամանակն էր:
Ազգային անվտանգության ծառայությունը բացահայտել է ավտոտեխզննության կեղծ կտրոններ տպող եւ իրացնող խմբի: Հայտնաբերվել է 1000-ից ավելի կեղծ կտրոն, նաեւ տպարանը, որտեղ պատրաստվել են դրանք: 9 անձի առաջադրվել են մեղադրանքներ, որոնցից ութի նկատմամբ որպես խափանման միջոց կալանք է կիրառվել: Ազգային անվտանգության ծառայությունը քաղաքացիներին կոչ է անում տեխզննման կտրոնները ձեռք բերել միայն սահմանված կարգով բացառապես հայաստանյան բանկերից:
Հայտնի լեզվաբան Փառանձեմ Մեյթիխանյանի ամուսնու սպանության գործով 3 կասկածյալ կա, որոնցից մեկը ձերբակալվել է, իսկ երկուսը հետախուզման մեջ են: Ձերբակալվածը Երեւանի Էրեբունի փողոցի բնակիչ 26-ամյա Խաչիկ Կոսյանն է, իսկ հետախուզվողները նույն փողոցի բնակիչներ՝ 23-ամյա Արտաշես Չիչոյանն ու 26-ամյա Արարատ Նիկողոսյանը: Խաչիկ Կոսյանը ԴԱՀԿ աշխատակից է, իսկ մյուս երկուսը չէին աշխատում: Խաչիկն ամուսնացած է Արտաշեսի քրոջ հետ: Հարեւանների խոսքով՝ երիտասարդները մանկության ընկերներ են, թաղային հեղինակություններ, 6 տարի առաջ Խաչիկը վրաերթի էր ենթարկել երկու երիտասարդ աղջիկների, որոնք այնուհետեւ կրկնակի վրաերթի ենթարկվելուց հետո մահացել էին։ Հիշեցնենք, որ օրերս Նուբարաշենի խճուղում 58-ամյա Եղիշե Խաչատրյանը ծեծի էր ենթարկվել մոր աչքի առջեւ, երբ երթեւեկության կանոնները խախտելու համար դիտողություն էր արել երեք երիտասարդի: Ստացած մարմնական վնասվածքներից Եղիշե Խաչատրյանը տեղում մահացել էր։ Ծեծի ենթարկողները փախուստի էին դիմել:
Նոր զարգացումներ նորածնին վաճառելու գործով. հունիսի 8-ին ձերբակալվել են «Արմենիա» հիվանդանոցի մանկաբարձ Կարինե Անտոնյանն ու «Արամյանց» բժաշկական կենտրոնի բուժքույր Գոհարիկ Խաչատրյանը: Վերջինիս օգնությամբ էր ապրիլին Ալլան իր երեխային վաճառել 5 հազար դոլարով, որից երկու հազար դոլարը տվել էր բուժքրոջը: «Արմենիա» բժշկական կենտրոնից NEWS.am-ի հետ րույցում վստահեցրել են, որ մյուս ձերբակալվածը՝ Կարինե Անտոնյանը, առք ու վաճառքի հետ կապ չուանի, պարզապես ծնունդն ընդունած մանկաբարձն է:
«Արմավիր» բժշկական կենտրոնի բշկուհին է դատապարտվել, գինեկոլոգ Հասմիկ Հակոբյանին դատարանը մեղավոր է ճանաչել մեծամորցի հղիի մահվան մեջ եւ դատապարտել երկու տարվա պայմանական ազատազրկման:Նարինե Շարոյանը մահացել է հուլիսի 1-ին: 3 օր առաջ 28-ամյա կինը թունավորում ախտորոշմամբ տեղափոխվել էր «Արմավիր» բժշկական կենտրոն, հոսպիտալացվել ինֆեկցիոն բաժանմունքում, որտեղ էլ վիճակը վատացել էր: Կեսարյան հատումից հետո նրան տեղափոխել էին «Արմենիա» բժշկական կենտրոն, որտեղ մահացել էր: Ըստ փորձագետների՝ եթե Հասմիկ Հակոբյանը հղիին ինֆեկցիոն բաժանմունք չուղարկեր եւ պատշաճ հսկողության տակ պահեր նրան, կնոջ կյանքը հնարավոր կլիներ փրկել:
Հայտնի է դարձել Արցախի Քաշաթաղի «Տաք ջրեր» կոչվող լճում 3 երիտասարդի խեղդվելու պատճառը: Նախնական վարկածը հաստատվել է՝ նրանք խեդդվել են լճից դուրս եկող գազից: Վերջին շրջանում ջուրը լճում պակասել էր, իսկ գազը՝ ավելացել, ջուրը մտնելուց կարճ ժամանակ անց երիտասարդները խեղդվել են: «Տաք ջրերում» դրանից հետո լողալն արգելվել է:
Դոլարն ու ռուբլին մի քիչ թանկացել են, իսկ եվրոն ու ֆունտը՝ թուլացել: Այսպիսով՝ դոլարի փոխարժեքն այսօր կազմել է 478, ռուբլունը 7.47, եվրոյինը՝ 543, իսկ ֆունտինը՝ 692 դրամ:
Երեւանում հունիսի 10-ին երեկոյան ժամերին եւ գիշերվա առաջին կեսին, սպասվում է անձրեւ եւ ամպրոպ:Առաջիկա գիշերը կլինի +13+15, իսկ վաղը ցերեկը՝ +25+27 աստիճան տաքություն։