Կրեմլում չեն բացառում Ռուսաստանի, Հայաստանի եւ Ադրբեջանի նախագահների եռակողմ հանդիպումը Սանկտ Պետերբուրգում: Ռուսաստանի նախագահի մամուլի խոսնակ Դմիտրի Պեսկովը ասել է, որ այդ ուղղությամբ արդեն աշխատանք է տարվում: Միաժամանակ, Մինսկի խմբի ամերիկացի համանախագահ Ջեմս Ուորլիքը հաստատել է, որ ղարաբաղյան հարցով հանդիպումը կկայանա հունիսի վերջին, թե ինչ կազմով ու ձեւաչափով՝ համանախագահը չի մանրամասնել:
Հայաստանի սահմանն անցած ադրբեջանցի կնոջը երեք օր անց վերադարձրել են Ադրբեջան: Կարմիր խաչի գրասենյակի միջնորդությամբ կնոջն ադրբեջանական կողմին են հանձնել հայ-ադրբեջանական սահմանին: Նշենք, որ ադրբեջանական կողմը պնդում է, թե 39-ամյա կինը հոգեկան խանգարում ունի: Հայրենիք վերադառնալուց հետո նրան տեղափոխել են հոգեբուժարան:
«Քվանտ» վարժարանի սանը հակառակորդի անօդաչուները չեզոքացնող սարք է պատրաստել: Նա այսօր իր ստեղծած սարքը ներկայացրել է վարժարան այցելած Հովիկ Աբրահամանին: Պատանին ասել է, որ գաղափարն իր մոտ ծնվել է ապրիլյան քառօրյա պատերազմից հետո: Այն հնարավորություն է տալիս խլացնել ռադիոալիքները եւ կարող է օգտագործվել ռազմարդյունաբերության ոլորտում:
Արցախի Ազգային ժողովի պատգամավոր Հայկ Խանումյանին ծեծի ենթարկելուց 4 օր անց երկու մարդ է ձերբակալվել՝ 39-ամյա Միքայել Սահակյանը եւ 48-ամյա Սերգեյ Ավանեսյանը։ Ընդ որում՝ նրանք Ստեփանակերտի ոստիկանություն են ներկայացել մեղայականով: Արցախի ոստիկանությունից տեղեկանում ենք, որ երկուսն էլ Ստեփանակերտի բնակիչներ են, կամավորներ: Սահակյանն ու Ավանեսյանը ձերբակալված են։
Մոտ մեկ տարի անազատության մեջ մնալուց հետո ազատ է արձակվել Արա Բուդաղյանը, որը մեղադրվում է Սյունիքի մարզպետ Սուրիկ Խաչատրյանի դեմ մահափորձ պատվիրելու մեջ: Քննչական մարմնից 11 ամիս է պահանջվել՝ պարզելու համար, որ Բուդաղյանը կատարվածի հետ կապ չունի: Նրա վրայից մեղադրանքը հանվել է: Հիշեցնենք, որ Բուդաղյանների ընտանիքը արդեն երկու տասնամյակ թշնամական հարաբերությունների մեջ է Սուրիկ Խաչատրյանի հետ: Նրանց հարաբերությունները նորից լարվել էին 2013 թվականին, ինչի հետեւանքով մարզպետի տան մոտ սպանվել էր Արա Բուդաղյանի ավագ եղբայրը՝ Արան, եւ ոչ ոք սպանության համար պատասխանատվություն չկրեց: Երկու տարի անց Երեւան-Գորիս ճանապարհին կրակել էին Սուրիկ Խաչատրյանի մեքենայի ուղղությամբ, Արա Բուդաղյանին առանց հիմնավոր ապացույցների մեղադրանք էր առաջադրվել եւ խափանման միջոց ընտրվել կալանքը:
Հունիսի 9-ի երեկոյան կայծակի հարվածից խոշոր հրդեհ է բռնկվել Լոռու մարզում: Կրակը սկսվել է Ջրաշեն գյուղի բնակիչ Լեւոն Հակոբյանին պատկանող փայտաշեն տանը, եւ մինչեւ հրշեջների գալը տարածվել է նաեւ հարակից տանը: Հակոբյանին պատկանող տունն ամբողջությամբ այրվել է: Ընտանիքը մնացել է անօթեւան:
Դժբախտ պատահար է տեղի ունեցել Իջեւանում:Կեսգիշերն անց Աղստեւ գետի վարարման հետեւանքով փլուզվել են «Քարեւարդ» հիդրոէլեկտրակայանի ամբարտակի երկու պատվարները, ինչի հետեւանքով ՀԷԿ-ի 47-ամյա աշխատակիցն ընկել է Աղստեւ գետը: Վարուժան Գաբրիելյանի մարմինը գտել են առավոտյան՝ Տավուշի մարզի Ազատամուտ գյուղի հատվածում: Վարուժանը Դիտավան գյուղից էր, երկու երեխաների հայր:
Մուհամեդ Ալիի հուղարկավորությանը մասնակցելու համար ԱՄՆ մեկնած՝ Ռեջեփ Թայիփ Էրդողանն առանց թաղմանը մասնակցելու վերադարձել է Թուրքիա: էրդողանը ցանկացել է ելույթ ունենալ լեգենդար բռնցքամարտիկի թաղման արարողությանը, սակայն Ալիի ընտանիքը մերժել է: Նրան թույլ չեն տվել նաեւ Մեքքայից բերված սուրբ կտորը դնել Ալիի դագաղի մեջ, ինչից վիրավորված Էրդողանը առանց թաղմանը մասնակցելու վերադարձել է Թուրքիա:
Այս միջադեպն Էրդողանի ամերիկյան այցի միակ վատ հիշողությունը չէ: Այցի վերջնական տապալումն ապահովել են Թուրքիայի նախագահի թիկնապահները: Էրդողանին մեքենայով ճանապարհելիս՝ ԱՄՆ հատուկ ծառայության աշխատակիցներից մեկն ըստ արարողակարգի փորձել է կանգնել մեքենայի դռան մոտ, ինչը դուր չի եկել Էրդողանի թիկնապահներին, ովքեր քաշքշուկ են հրահրել։
Ֆրանսիայում մեկնարկում է ֆուտբոլի Եվրոպայի առաջնությունը: NEWS.am-ի թղթակիցը Ֆրանսիայից լուսաբանելու է Եվրո 2016-ը, լուսաբանման գլխավոր հովանավորն է UCOM ընկերությունը: Առաջին անգամ Եվրոպայի առաջնությոանը կմասնակցի 24 հավաքական: Ֆավորիտներ են համարվում կազմակերպիչ Ֆրանսիան, աշխարհի չեմպիոն Գերմանիան, Եվրոպայի չեմպիոն Իսպանիան, նաեւ Անգլիան, Բելգիան, Պորտուգալիան եւ Իտալիան: Առաջին անգամ կլինի 1/8 եզրափակիչ, մինչդեռ նախկինում փլեյ-օֆֆը սկսվում էր քառորդ եզրափակիչից: Փարիզյան ահաբեկչություններից հետո Եվրո-2016-ի կազմակերպիչների համար առաջին տեղում անվտանգության խնդիրն է: Մրցաշարի մասնակիցների, երկրպագուների անվտանգությունը ապահովելու համար ծախսվել է 45 միլիոն եվրո: Սպասվում է, որ մեկ ամսում Ֆրանսիա կայցելի մոտ 2.5 միլիոն ֆուտբոլասեր: Ֆուտբոլային տոնի մեկնարկը Երեւանի ժամանակով 23:00-ին է: Չեմպիոնը հայտնի կդառնա հուլիսի 10-ին կայանալիք եզրափակիչում:
Այսօր արժևորվել է միայն դոլարը, ռուբլին , եվրոն ու ֆունտը թուլացել են: Եվ այսպես, դոլարի փոխարժեքը կազմել է 479, ռուբլունը՝ 7.41, եվրոյինը՝ 540, իսկ ֆունտինը՝ 691 դրամ:
Շաբաթ երեկոյան ժամերին եւ գիշերվա առաջին կեսին Երևանում սպասվում է անձրեւ եւ ամպրոպ, առաջիկա գիշերը օդի ջերմաստիճանը կհասնի +13-ի, իսկ վաղը ցերեկը՝ +27-ի:
