«Սասնա Ծռեր» խմբի անդամ Սեդրակ Նազարյանն այսօր տեղափոխվել է հիվանդասենյակ, ապա դատարան, որտեղ քննվելու էր նրա կալանավորելու միջնորդությունը։ Փաստաբան Լուսինե Սահակյանի խոսքով՝ Սեդրակ Նազարյանը հայտարարել է, որ մեղադրանքն իրեն պարզ չէ, եւ հրաժարվել է ցուցմունք տալ ու հարցերին պատասխանել, քանի որ 12 օր ապօրինի զրկվել է ազատությունից եւ արտաքին աշխարհի հետ որեւէ կապից, մինչ օրս չի ճանաչվել տուժող եւ իր նկատմամբ ապօրինի քրեական հետապնդում է իրականացվում։
«Սասնա ծռեր» խմբին օժանդակելու մեղադրանքով կալանավորված ազատամարտիկ Մհեր Մազմանյանի 6 անչափահաս երեխաներին օգնելու նպատակով դրամահավաք է մեկնարկել: Երեւանի Հյուսիսային պողոտայում: Մհեր Մազմանյանը ընտանիքի միակ աշխատողն էր, եւ ապրում էր վարձով, եւ այժմ նրա ընտանիքը կարող է հայտնվել դրսում: Հյուսիսային պողոտայում դրամահավաքը կշարունակվի նաեւ օգոստոսի 13-ին:
Գյումրիում Ավետիսյանների ընտանիքի անդամների սպանության մեջ մեղադրվող Վալերի Պերմյակովի համար դատախազը ցմահ ազատազրկում է պահանջել: Այսօր դատական նիստին դատախազը ճառով հանդես է եկել առանց տուժողի իրավահաջորդների ներկայացուցիչների: Նրանք նիստի կեսին լքել են դահլիճը, քանի որ դատավորը հրաժարվել է բավարարել միջնորդությունը՝ քաղաքացիական հայցի հետ կապված վճռաբեկ բողոքի համար նիստը 2-3 շաբաթով հետաձգելու վերաբերյալ:
Մոսկվայում այս գիշեր հայն ու ղըրղըզը սքինհեդների զոհ են դարձել: Իրավապահ մարմինների հաղորդմամբ, երեք երիտասարդ եկել են հային պատկանող գարեջրի խանութ, վեճ հրահրել եւ սպանել հայաստանցի Լեւ Քամալյանին եւ հաճախորդ, ղըրղըզ Նուրիկ Մունդուզովին: Ռուսական լրատվամիջոցները հաղորդում են, որ հանցագործությունը տեղի է ունեցել ազգային անհանդուրժողականության հողի վրա։
Անցած տարվա հոկտեմբերին վրաերթի հետեւանքով մահացած Գյուղատնտեսության նախարարության ջրային տնտեսության պետական կոմիտեի աշխատակազմի ղեկավար Մհեր Մկրտումյանին եւ նրա կնոջը վրաերթի ենթարկելու մեջ մեղադրվող վարորդը դատապարտվեց 4 տարվա ազատազրկման: Դատարանը նաեւ 2 տարով զրկեց Գեւորգ Գեւորգյանին վարորդական իրավունքից: Վարորդը պարտավորվեց նաեւ շուրջ 2 մլն դրամ հատկացնել Մկրտումյանների հարազատներին: Հիշեցնենք, որ Մհեր Մկրտումյանը վթարից օրեր անց մահացել էր:
Ռիոյի Օլիմպիական խաղերում երրորդ հայ մարզիկը դարձավ մեդալակիր: Ռուսաստանի հավաքականի կազմում հրաձգության մրցաշարին մասնակցեց Կիրիլ Գրիգորյանը: Հրացանից, պառկած, 50 մետրից մրցաձեւում նա նվաճեց բրոնզե մեդալ:
24-ամյա պետերբուրգցի մարզիկի մարզիչը հայրն է՝ միջազգային կարգի սպորտի վարպետ Հակոբ Գրիգորյանը:
Բռնցքամարտի մրցաշարում Հայաստանի ներկայացուցիչներից 69 կգ քաշային Վլադիմիր Մարգարյանն անցկացրեց երկրորդ մենամարտը: Մրցակիցը Լոնդոն-2012-ի Օլիմպիական խաղերի չեմպիոն, կուբացի Ռոնիել Իգլեսիասն էր:
Առաջին ռաունդում Վլադիմիր Մարգարյանը հոնքի պատռվածք ստացավ եւ պահանջվեց բժիշկների օգնություն: Պատռվածքի վրա կար դնելուց հետո հայ մարզիկը շարունակեց մենամարտը, սակայն արնահոսությունը վերսկսվեց եւ մրցավարները կանոնադրության համաձայն, թույլ չտվեցին նրան շարունակել պայքարը՝ հաղթանակը շնորհելով Իգլեսիասին: Գրանցվեց տեխնիկական նոկաուտ:
1/16 եզրափակիչում Վլադիմիր Մարգարյանը 3։0 առավելությամբ հաղթել էր Ֆիջիի ներկայացուցիչ Ուինսթոն Հիլին:
«Ինձ բացարձակ չէր ճնշում ու մտահոգում այն, որ ռինգ էի դուրս եկել օլիմպիական չեմպիոնի հետ։ Ավելին, ուրախ էի եւ պատրաստ էի ամեն ինչ անել՝ հաղթելու համար։
Այստեղ ամբողջ աշխարհն է քեզ հետեւում, ու դու ավելի մեծ պատասխանատվություն ես զգում լավ ներկայանալու, քո երկիրը ներկայացնելու համար: Օլիմպիական ռինգում միաժամանակ ապրեցի եւ մեծ ուրախություն, եւ մեծ ափսոսանք»,- NEWS.am Sport-ի թղթակցին ասել է Վլադիմիր Մարգարյանը պարտությունից հետո:
Ռիոյի Օլիմպիական խաղերի լողի մրցաշարին մասնակցեց Հայաստանի պատվիրակության դրոշակակիր Վահան Մխիթարյանը: Ազատ ոճով 50 մետրում հայ մարզիկը ցույց տվեց 23.50 վայրկյան արդյունք եւ չհաղթահարեց որակավորման փուլի արգելքը: Պայքարը շարունակում են 16 ուժեղագույնները: Վահան Մխիթարյանը գրավեց 47-րդ տեղը:
Հայաստանի օլիմպիականներ, աթլետ Գոռ Ներկարարյանը եւ լողորդ Մոնիկա Վասիլյանը չեն մասնակցի Ռիոյի Օլիմպիական խաղերին։ Օգոստոսի 12-ին պայքարի մեջ պետք է մտներ լողորդ Մոնիկա Վասիլյանը 50 մետր ազատ ոճ մրցաձեւում, սակայն NEWS.am Sport-ին հայտնի դարձավ, որ լողորդը ձեռքը վնասելու պատճառով բաց կթողնի Օլիմպիական խաղերում իր մրցելույթը։
Այս օրերին պայքարի մեջ պետք է մտնեն նաեւ հայ աթլետները, ովքեր Խաղերին ներկայացել են վեց օլիմպիականներով: Սակայն հեռացատկորդ Գոռ Ներկարարյանի անունը բացակայում է հայտավորված մարզիկների ցուցակից:
ԱՄՆ դոլարի փոխարժեքն աննշան նվազել է՝ կազմելով 476 դրամ։ Եվրոյի փոխարժեքը կազմել է 530, բրիտանական ֆունտինը՝ 616, ռուսական ռուբլունը՝ 7.36 դրամ։
Հանրապետության տարածքում օգոստոսի 13-ին սպասվում է առանց տեղումների եղանակ: Առաջիկա գիշերը մայրաքաղաքում կդիտվի +23+25, իսկ վաղը ցերեկը՝ +38+40 աստիճան տաքություն: