Եվրամիության անդամ վերջին պետությունը՝ Բելգիան, հավանության է արժանացրել Կանադայի հետ ազատ առեւտրի գոտու մասին համաձայնագիրը: Ըստ Reuters-ի՝ սա ճանապարհ է հարթում փաստաթղթի ստորագրման համար, որի արարողությունը նախանշված է կիրակի՝ հոկտեմբերի 30-ին: Այդ առիթով Բրյուսել կժամանի Կանադայի վարչապետ Ջասթին Թրյուդոն:
Lenta-ի փոխանցմամբ՝ մինչ այդ, ԵՄ 28 երկրների կառավարությունները սատարել էին Տնտեսական եւ առեւտրային համալիր համաձայնագիրը (CETA), սակայն Բելգիայի կողմից վավերացումը հարցականի տակ էր, քանի որ անհրաժեշտ էր տեղական ներկայացուցչական մարմինների համաձայնությունը: Համաձայնագրին դեմ էր Բելգիայի ֆրանսախոս շրջանը՝ Վալոնը: Այդ պատճառով փաստաթղթի ստորագրումն անհնար էր թագավորության եւ, բնականաբար, ԵՄ-ի համար:
