Ղարաբաղյան հակամարտության կարգավորման գործընթացի փակուղու համար պետք չէ մեղադրել ԵԱՀԿ-ին կամ էլ դրա նախագահությանը։ Այս մասին հայտնել է Գերմանիայի արտգործնախարար, ԵԱՀԿ գործող նախագահ Ֆրանկ Վալտեր Շթայնմայերը, պատասխանելով «բանակցային փակուղու» մասին ադրբեջանցի լրագրողի հարցին։
«Ես չեմ ուզում մատով ցույց տալ, բայց դրա համար պատասխանատու են նրանք, ովքեր այս տարվա ապրիլին սկսեցին հակամարտությունը, ինչի հետեւանքով շատ մարդիկ են տուժել»,- պատասխանել է Շթայնմայերը ադրբեջանցի լրագրողին։
Նրա խոսքով, եթե ԵԱՀԿ-ն չկարողանար հասնել դեէսկալացիայի, Հայաստանի ու Ադրբեջանի միջեւ հակամարտությունը նոր ուժով կբորբոքվեր։ «Համանախագահները աշխատում են բանակցությունները վերսկսելու ուղղությամբ, բայց դա հեշտ չէ անել ապրիլից հետո»,- ասել է նա։
Շթայնմայերը նշել է, որ կցանկանար, որ հակամարտության կողմեըը ավելի բաց լինեին ու ավելի շատ ձգտեին փոխզիջման, բայց ԵԱՀԿ-ն չի կարող ստիպել նրանց, այլ կարող է միայն դրա համար հող նախապատրաստել։ «Անհրաժեշտ է կողմերի պատրաստակամությունը, առանց դրա ԵԱՀԿ-ն չի կարող կայունություն ստեղծել»,- նկատել է նա։
