ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժնում քննություն է տարվում՝ պարզելու 56-ամյա Ռոբերտ Հարությունյանի մահվան հանգամանքները: Նա ԱԱԾ տնօրենի նախկին տեղակալ Ռոմիկ Հարությունյանի եղբայրն է:
ՀՀ Քննչական կոմիտեից NEWS.am-ին հայտնում են, որ 2016 թվականի դեկտեմբերի 14-ին՝ ժամը 00:20-ին, ահազանգ է ստացվել առ այն, որ «Նկարիչների Միության» շենքի՝ Երեւան քաղաքի Աբովյան փողոցում գտնվող հյուրանոցում մահացել է 56-ամյա Ռոբերտ Հարությունյանը:
Անմիջապես դեպքի վայր է մեկնել քննչական-օպերատիվ խումբը՝ փորձագետի եւ դատաբժշկի հետ միասին:
Դեպքի վայրի զննությամբ հայտնաբերվել է Երեւան քաղաքի բնակիչ, 1960 թվականին ծնված Ռոբերտ Հարությունյանի դին՝ գլխի շրջանում հրազենային վնասվածքով: Զննությամբ վերջինիս աջ ձեռքում հայտնաբերվել է «ԳԼՕՔ 19, ՄԱՅ 289» տեսակի ատրճանակ, իսկ հատակին՝ մեկ պարկուճ եւ գնդակ:
Նշանակվել են դիակի դատաբժշկական, դատաքիմիական եւ դատաձգաբանական փորձաքննություններ:
Դեպքի հանգամանքները պարզելու համար հանձնարարություն է տրվել ոստիկանության համապատասխան ստորաբաժանումներին:
Ավելի վաղ NEWS.am-ը հայտնել էր, որ գլխի շրջանում հրազենային վնասվածքով հայտնաբերված Ռոբերտ Հարությունյանը, որը ԱԱԾ տնօրենի նախկին տեղակալ Ռոմիկ Հարությունյանի եղբայրն է, տեւական ժամանակ վարձով էր ապրում Նկարիչների միության շենքում: Մեր տեղեկություններով` Միության 4-րդ հարկում վարձով սենյակներ են տրամադրվում, դրանցից մեկն էլ Ռոբերտ Հարությունյանն էր վարձակալել: Նա միայնակ էր այնտեղ ապրում: Մեզ հայտնի է դարձել, որ Ռոմիկ Հարությունյանն է հայտնաբերել եղբոր դին եւ «Շտապօգնություն» կանչել: