Ձնաբքի պատճառով չկան ճանապարհամաքրման թույլատրելի պայմաններ: Այս մասին NEWS.am-ին հայտնեցին ՀՀ Տրանսպորտի, կապի եւ տեղեկատվական տեխնոլոգիաների նախարարության մամուլի ծառայությունից՝ անդրադառնալով հարցին, թե ինչու չեն իրականացվում ձնամաքրման աշխատանքներ մասնավորապես Արագոծոտնի մարզում, որտեղ տասնյակ մեքենաներ մնացել են ձնաբքի մեջ:
«Ձնաբքի պատճառով չկան ճանապարհամաքրման թույլատրելի պայմաններ, քանի որ քամին մաքրած ձյունը կվերադարձնի ճանապարհի վրա։ Երբ բուքը դադարի, մաքրումը կիրականացվի»,-ասացին նախարարությունից:
Ավելի վաղ NEWS.am-ը հայտնել էր, որ այսօր՝ դեկտեմբերի 14-ին, արդեն մի քանի ժամ է՝ Քուչակ-Ապարան ավտոճանապարհը ամբողջությամբ դժվարանցանելի է ձնաբքի եւ մերկասառույցի պատճառով։ NEWS.am-ի թղթակցին դեպքի վայրից հայտնել են, որ ճանապարհները մաքրված չեն, մեքենաները երթեւեկում են մեծ դժվարությամբ։