Ադրբեջանը հերթական սադրանքն է նախաձեռնել Լեռնային Ղարաբաղի հետ շփման գծում. նախ ԵԱՀԿ առաքելությանը թույլ չի տվել դիտարկում իրականացնել իր առաջնային դիրքերում, ինչից հետո երեկոյան ժամը 17:00-ից սկսած մոտ 2 ժամ ադրբեջանական բնակավայրերի մերձակայքում տեղակայված կրակային հենակետերից արկակոծել է պաշտպանության բանակի մարտական դիրքերը՝ հրանոթներից բացի օգտագործելով տարբեր տրամաչափի ականանետեր: Լեռնային Ղարաբաղի պաշտպանության նախարարությունը հայտարարել է, որ սադրանքները շարունակվելու դեպքում Պաշտպանության բանակն իրեն իրավունք է վերապահում դիմելու ոչ համարժեք քայլերի:
Գագիկ Ծառուկյանի նախընտրական ծրագրերը, կարծես, փոխվում են։ Նախկինում նա հայտարարել էր, որ «Ծառուկյան» դաշինքով է գնալու ընտրությունների, սակայն վերջին օրերի զարգացումները ցույց են տալիս, որ հնարավոր է՝ Ծառուկյանի մասնակցության ձեւաչափը փոխվի: ԲՀԿ-ականներն ասում են՝ դժվարությամբ կարողացել են համոզել նրան կրկին ստանձնել ԲՀԿ ղեկավումը։ Եվ արդեն փետրվարի 10-ին կայանալիք կուսակցության համագումարում այդ հարցը կորոշվի։ Նույն օրը պարզ կդառնա՝ արդյոք դաշինքով են մասնակցելու ընտրություններին, թե ոչ, եւ ովքեր են լինելու դաշինքում։
Ընդամնեը օրեր առաջ Ծառուկյանի հետ բանակցող՝ ՍԴՀԿ-ն, ՀՌԱԿ-ը եւ ՀՀՇ-ն, պնդում էին, որ արդեն կա ընտրություններին Ծառուկյանի հետ մանսակցելու համաձայնություն։ Սակայն նախօրեին հայտնի դարձավ, որ ՀՌԱԿ–ի հետ համագործակցություն չի լինելու։ ՍԴՀԿ-ի հետ բանկացությունները դեռ շարունակվում են:
Որոշ տեղեկությունների համաձայն՝ այս օրերին անորոշության մեջ են Ծառուկյանին միանալու պատրաստակամություն հայտնած բոլոր գործիչներն ու քաղաքական ուժերը։ Հնարավոր է՝ Ծառուկյանը փոշմանի եւ դաշինքը այդպես էլ չկայանա, ԲՀԿ-ն միայնակ մասնակցի ընտրություններին:
Տարաձայնություններ կան նաեւ Օսկանյան-Օհանյան դաշինքում: Ասում են՝ անհամաձայնությունը ցուցակի անցողիկ տեղերի շուրջ է։ Դաշինքին միացած Պարույր Հայրիկյանը պառակտման վտանգ է տեսնում։ Նա չի բացառել, որ եթե այսպես շարունակվի, ԱԻՄ-ը դուրս կգա դաշինքից:
Եթե Ծառուկյանի դեպքում գոնե համագումարի օրը նշանակված է, Օսկանյան-Օհանյան դաշինքի դեպքում այդ հեռանկարն էլ չկա։
Նաիրա Զոհրաբյանն այսօր խորհրդարանի ամբիոնից հայտարարել է. ընտրությունների նախաշեմին մարզպետերն անցել են սպառնալիքների` «իրենց հոգեհարազատ ժանրին»: Տեղեկացրել է, որ մի մարզպետ սպառնացել է ԲՀԿ-ական գյուղապետերին, բայց հրաժարվել է անուն տալ: Փոխարենը պատասխան սպառնալիք է հնչեցրել. «մառոզներով մի խոսեք, շատ արագ մառոզի տակ կմնաք»:
Հարկերը չվճարելու համար նախատեսվող պատիժը կմեղմացվի: Ազգային ժողովն այսօր առաջին ընթերցմամբ ընդունել է Քրեական օրենսգրքում համապատասխան փոփոխությունների օրինագիծը: Այսուհետ ճաղերի հետեւում կհայտնվեն առանձնապես խոշոր չափերով՝ ավելի քան 2 մլն դրամի չափով հարկերի վճարումից չարամտորեն խուսափելու համար: Բայց չարամտության ձեւակերպումը սահմանված չէ. այն թողել են հարկային տեսուչների եւ քննիչների հայեցողությանը:
Պատգամավորներին նաեւ այլ օրենսդրական նախագծեր են ներկայացվել. փոփոխություններ են արվում «Ներդրումային ֆոնդերի մասին», «Բնակարանային հիփոթեքային կրեդիտավորման մասին», «Կուտակային կենսաթոշակների մասին» եւ մի շարք այլ օրենքներում: Վերջին օրինագծի քննարկումը Միքայել Մելքումյանի եւ Հակոբ Հակոբյանի միջեւ վիճաբանության առիթ է դարձել: Մելքումյանին հետաքրքրում էր, արդյո՞ք այս տարվա հուլիսի 1-ից մասնավոր հատվածը սկսելու է պարտադիր կուտակային վճարումներ անել: Հակոբյանի երկար պատասխանը զայրացրել է գործընկերոջը: Մելքումյանը հստակ պատասխան է պահանջել՝ կոչ անելով զերծ մնալ կուրծք ծեծելով բոցաշունչ ելույթներից:
Գագիկ Մելիքյանի ելույթի ժամանակ էլ Ազգային ժողովի լույսերն անջատվել են: Շարմազանովն արձագանքել է. Հրանտ Բագրատյանն այնպիսի հարցեր է տալիս, որ «սաղ ֆազերը գցում են»:
Սպիտակ բիզնեսը պետք է իրեն լավ զգա Հայաստանում, իսկ սեւի հանդեպ պետք է անողոք լինել: Վարչապետ Կարեն Կարապետյանը այսպիսի խնդիր է դրել Պետեկամուտների կոմիտեի առջեւ: Պետական կառավարման մարմինների հաշվետվությունների քննարկման ժամանակ վարչապետն ասել է՝ երկրում բիզնես միջավայրի բարելավման գլխավոր պատասխանատուն Պետեկամուտների կոմիտեն է։
Բենզինի գինը թանկացել է եւ տնտեսական մրցակցության պաշտպանության պետական հանձնաժողովը սկսել է ուսումնասիրել պատճառները: Անցյալ տարեվերջին բենզինի գինը սկսել էր նվազել՝ հասնելով 330 դրամի: Այս տարվա հունվարի վերջից, սակայն, վառելիքի գինը նորից սկսել է թանկանալ. նախ՝ 10 դրամով, իսկ հետո՝ եւս 20 դրամով: Թանկացումների արդյունքում հիմա բենզինի գինը 370-400 դրամի սահմաններում է: Հանձնաժողովը թանկացման պատճառների մասին խոշոր ներկրողներից ու պատկան մարմիններից տեղեկություններ եւ հիմնավորումներ է պահանջել: Ուսումնասիրության ավարտին էլ կներկայացվի շուկայում տիրող իրավիճակի գնահատականը:
Հզոր պայթյուն Վայոց ձորում: Պայթյունը որոտացել է Վայք-Մեղրի ավտոճանապարհին տեղակայված գազալցակայանում: Արդյունքում տեղի է ունեցել փլուզում, մի քանի բալոններ այս ու այն կողմ են շպրտվել: Զոհեր եւ վիրավորներ, բարեբախտաբար, չկան: Նախնական վարկածով՝ պայթյունն առաջացել է կոմպրեսորների հատվածում։
Դոլարի փոխարժեքը կայուն է, իսկ եվրոն եւ ռուբլին էժանացել են: Արդյունքում դոլարի փոխարժեքն այսօր կազմել է 486 դրամ, եվրոյինը՝ 518, ռուբլունը՝ 8 դրամ 18 լումա, ֆունտինը՝ 601 դրամ:
Ցուրտը, կարծես, աստիճանաբար ուզում է նահանջել: Փետրվարի 8-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: