Հայաստանի դեմոկրատական կուսակցությունը Օսկանյան-Օհանյան-Դալլաքյան ձեւավորվող դաշինքից դուրս գալւ որոշումը կայացվել է նախօրեին՝ կուսակցության խորհրդի նիստում։ Այս մասին այսօր՝ փետրվարի 10-ին, լրագրողների հետ հանդիպման ժամանակ նշել է կուսակցության նախագահ Արամ Սարգսյանը։
Նրա խոսքով, դաշինք ձեւավորելու համար իրենք ներկայացրել են 4 սկզբունքային դրույթներ, որոնց շուրջ նախնական համաձայնության էին եկել, սակայն փորձը ցույց տվեց, որ այդ պայմանավորվածությունները խախտվում են։
«Նախեւառաջ պետք է ձեւավորվեր միասնական խորհուրդ, որի շրջանակներում պետք է կոնսեսուսային որոշումներ կայացվեին։ Ամենակարեւոր հարցը, որ պետք է քննարկվեր խորհրդում՝ դաշինքի ծրագիրն էր, ինչպես նաեւ հարցը, թե ովքեր են լինելու դաշինքի կազմում։ Մինչդեռ, մինչ օրս նման խորհուրդ ձեւավորված չէ, ավելին, ծրագրերի քննարկման մասին որեւէ խոսք չկա։ Եթե մենք կուսակցությունների ներկայացուցիչներով հավաքվել եւ քննարկել ենք, ապա դա պետք է լինի խորհուրդ, եթե դա խորհուրդ է, ապա դա պետք է որոշումներ կայացնող խորհուրդ լինի։ Եթե դա խորհուրդ է, ապա պետք է քննարկի բոլոր կուսակցությունների կողմից ներկայացված հիմնական ծրագիրը»,-ասաց ՀԴԿ ղեկավար՝ հավելելով, որ բոլորը կենտրոնացած են ցուցակների կազմման վրա, ինչը երկրորդական պետք է լիներ եւ սկզբունքային նշանակություն պետք է չունենար։
Արամ Սարգսյանը նշել է, որ այս պահին ներկայումս այլ դաշինքների հետ լուրջ բանակցություններ տարվում են՝ միասնական մասնակցելու համար. «Երկրի վիճակն այնպիսին է, որ մենք հիմա կամ գնում ենք երկիրը այլ ճանապարհով տանելու, կամ ուղղակի անիմաստ են մեր բոլոր գործողությունները։ Շատ ավելի լավ կլինի, եթե մենք, այսպես ասած, «զուլալված» գնանք ընտրությունների, քան այս անորոշության մեջ փորձենք ինչ-որ բան գտնել»։
Հարցին, թե հնարավո՞ր է, ձեւավորվող դաշինքից դուրս գան նաեւ այլ ուժերը, ՀԴԿ ղեկավարն ասաց, որ նման մտադրություն ունի «Երրորդ հանրապետությունը», նաեւ ԱԻՄ-ը:
Նշենք, որ շաբաթներ առաջ «Համախմբում» կուսակցությունը (նախագահ Վարդան Օսկանյան), «Երրորդ հանրապետություն» կուսակցությունը (նախագահ Վիկտոր Դալլաքյան) եւ Հայաստանի դեմոկրատական կուսակցությունը (նախագահ Արամ Գ. Սարգսյան) հայտարարել էին դաշինք ստեղծելու մասին: Ավելի ուշ ստոեղծվող դաշինքին միանալու մասին հայտարարել էին ԱԻՄ-ը (ղեկավար Պարույր Հայրիկյան) եւ Ժողովրդական կուսակցությունը (ղեկավար Տիգրան Կարապետյան): Նշվում էր, որ առաջիկա դաշինքի համապետական ցուցակը, ամենայն հանավականությամբ, գլխավորելու է պաշտպանության նախկին նախարար Սեյրան Օհանյանը: