ԱԺ «Ժառանգություն» խմբակցության պատգամավոր Զարուհի Փոստանջյանը խորհրդարանական ընտրություններին մասնակցելու վերաբերյալ հայտարարություն կանի առաջիկայում: Այս մասին այսօր՝ փետրվարի 13-ին, NEWS.am-ի հետ զրույցում ասաց նա: Զարուհի Փոստանջյանը նշեց, որ ընտրություններին մասնակցելու վերաբերյալ մանրամասներ կհաղորդի փետրվարի 16-ից հետո:
«Ես մամուլի ասուլիսով հանդես կգամ, իմ հայտարարությունը կանեմ: Փետրվարի 16-ից հետո ամեն ինչ պարզ կլինի»,-ասաց նա՝ հրաժարվելով պատասխանել այլ հարցերի:
Ավելի վաղ տեղեկացրել էինք, որ Պաշտպանության նախկին նախարար Սեյրան Օհանյանը, նախկին արտգործնախարար, «Համախմբում» կուսակցության ղեկավար Վարդան Օսկանյանը եւ «Ժառանգություն» կուսակցության ղեկավար Րաֆֆի Հովհաննիսյանը այսօր հուշագիր կստորագրեն խորհրդարանական ընտրություններին դաշինքով մասնակցելու վերաբերյալ:
Արմեն Մարտիրոսյանը մեզ հետ զրույցում նշել էր, որ Զարուհի Փոստանջյանը չի մասնակցել փետրվարի 12-ին կուսակցության նիստին, նա դեմ է այդ դաշինքներին եւ արդեն հայտարարել է, որ ընտրություններին չի մասնակցելու:
Հիշեցնենք, որ Օսկանյան-Օհանյան դաշինքն արդեն լքել են ԱԻՄ-ը, Հայաստանի Դեմոկրատական կուսակցությունը եւ Վիկտոր Դալլաքյանի ղեկավարած «Երրորդ Հանրապետություն» կուսակցությունը:
