Թուրքիայի Այդընի նախկին քաղաքապետ Օրհան Էսինի տանը որպես սպասուհի աշխատող Վրաստանի քաղաքացի Լ.Կ.–ն սպանել է տանտիրուհուն, թալանել տունն ու հեռացել։
Թուրքական Hurriyet–ի փոխանցմամբ՝ նախկին քաղաքապետի տանը որպես սպասուհի աշխատող Լ.Կ.–ն բութ առարկայով հարվածել է տանտիրուհու գլխին եւ սպանել։ Այնուհետ վերցրել է տանը գտնվող թանկարժեք զարդերն ու կրեդիտ քարտերն ու փորձել հեռանալ Վրաստան։
Այդ ընթացքում տանտիրուհու հարեւանուհիներն են զանգահարում։ Վրացի սպասուհին է նրա հեռախոսին պատասխանում՝ ասելով, թե տանտիրուհուն հարմար չէ խոսելը։ Մի քանի անգամ նման պատասխան ստանալուց հետո հարեւաններն իրենց մոտ գտնվող պահեստային բանալիով դուռը բացում ու ներսում հայտնաբերում են տանտիրուհու դին։
Ահազանգի հիման վրա ոստիկանությունը սկսել է փնտրել սպասուհուն եւ նրան հայտնաբերել դեպի Վրաստան գնացող ավտոբուսի մեջ։
