ԵԱՀԿ ՄԽ համանախագահները Ստեփանակերտում հանդիպել են ԼՀՂ նախագահ Բակո Սահակյանի հետ։
NEWS.am-ի թղթակիցը հայտնում է, որ հանդիպման արդյունքներով կայացած ճեպազրույցի ժամանակ ԵԱՀԿ ՄԽ ռուսաստանցի համանախագահ Իգոր Պոպովը նշել է , որ այցելությունը նվիրված է Ադրբեջանի նախագահի հետ մարտի 11-ին ու Հայաստանի նախագահի հետ նախօրեին կայացած հանդիպումներին։
Հանդիպման ժամանակ մի շարք թեմաներ են քննարկվել։ Դրանցից մեկն էր Վիեննայի ու Սանկտ Պետերբուրգի գագաթնաժողովների ընթացքում ձեռք բերված պայմանավորվածությունների իրականացման ընթացքը, հայտնել է համանախագահը։
«Մենք լսեցինք կողմերից յուրաքանչյուրին։ Այդ խոսակցության շարունակությունը կլինի Վիեննայում, Մինսկի խմբի հանդիպման ժամանակ։ Մենք նաեւ ակնկալում ենք հանդիպում ԵԱՀԿ ղեկավարության հետ։ Մենք ծրագրում ենք հանդիիպել Բարձր մակարդակի պլանավորման խմբի հետ»,- հայտնել է Իգոր Պոպովը։
Այն հարցին՝ արդյոք մոտ է այն ժամանակը, երբ Ստեփանակերտը կմիանա բանակցային գործընթացին, միջնորդը նշել է, որ այդ թեման այսօր չի քննարկվել։
«Այսօր մենք քննարկել ենք Կասպրշիկի խմբի ընդլայնման հարցերը։ Դուք գիտեք, որ ձեռք է բերվել պայմանավորվածություն՝ նրա խումբը յոթ մարդով ավելացնելու մասին։ Կան էլի մի շարք հարցեր, որոնք կապված են տեխնիկական խնդիրների հետ։ Այսօր Անջեյ Կասպրշիկը շարադրել է իր տեսակետները, թե ինչպես կարելի է դա անել։ Դա կլինի այն թեմաներից մեկը, որը մենք հույս ունենք քննարկել ապրիլին»,- նշել է Իգոր Պոպովը։