Հայաստանի ու Ադրբեջանի նախագահները հայտնել են, որ պատրաստ են շարունակել բանակցային գործընթացը՝ խնդրի քաղաքական լուծման ուղղությամբ։ Այս մասին ասված է ԵԱՀԿ ՄԽ համանախագահների հայտարարության մեջ, որը հրապարակվել է տարածաշրջան կատարած այցելությունների արդյունքներով։

ԵԱՀԿ ՄԽ համանախագահներ Իգոր Պոպովը, Ստեֆան Վիսկոնտին ու Ռիչարդ Հոուգլանդը ԵԱՀԿ գործող նախագահի անձնական ներկայացուցիչ Անջեյ Կասպրշիկի հետ միասին այցելել են Բաքու (մարտի 11-ին) ,Երևան (մարտի 27-ին) ու Լեռնային Ղարաբաղ (մարտի 28-ին)։

Համանախագահների այցելությունների գլխավոր նպատակն է եղել շփման գծում ու հայ-ադրբեջանական սահմանին տիրող իրավիճակի մասին ամենաարդիական, մանրակրկիտ քաղաքական ու ռազմական տեղեկություններ ստանալը, 2016-ին Վիեննայի ո ւ Սանկտ Պետերբուրգի գագաթնաժողովներում ձեռք բերված համաձայնագրերի իրականացումը քննարկելը, կարգավորման ուղղությամբ հետագա քայլերը դիտարկելը։

Հայտարարության մեջ ասվում է, որ համանախագահները հանդիպել են Ադրբեջանի ու Հայաստանի նախագահների ու արտգործնախարարների հետ ու Լեռնային Ղարաբաղի իշխանությունների հետ։ Նրանք նաև այցելել են Լեռնային Ղարաբաղի շուրջ  գտնվող տարածքներ։ Իրենց բանակցությունների ընթացքում համանախագահները նորից խորը մտահոգություն են հայտնել շփման գծում վերջին միջադեպերի կապակցությամբ՝ կողմերին կոչ անելով զսպվածություն դրսևորել իրենց հռետորաբանության ու  գործողությունների մեջ։ Նախագահները շարադրել են իրենց դիրքորոշումները ՝ հրադադարի ռեժիմի ամրապնդմանն ու մանավանդ Նովրուզի ու Զատիկի տոների համատեքստում հետագա էսկալացիայից խուսափելուն ուղղված՝ համանախագահների առաջարկների մասին։

Իրենց զրույցներում համանախագահները շեշտել են դեսպան Կասպրշիկի առաքելությանը մշտապես աջակցելու ու այն ընդլայնելու սկզբունքային կարևորությունը։ Միջնորդները նաև շեշտել են իրենց այն համոզմունքը, որ հրադադարի պահպանումը առաջնահերթ նշանակություն ունի վստահության մթնոլորտ ստեղծելու համար, որն անհրաժեշտ է հետագա բանակցություններ անցկացնելու համար։

Համանախագահները կուղևորվեն Վիեննա, որպեսզի Մինսկի խմբի անդամներին տեղեկացնեն այցելության արդյունքների մասին։