Ադրբեջանի քաղբանտարկյալների պաշտպանության կենտրոնը ապրիլի 1-ին հրապարակել է երկրում քաղբանտարկյալների լրացված ցուցակը, որում 162 մարդու անուն կա։
contact.az-ի փոխանցմամբ ցուցակը կազմվել է Խաղաղության ու ժողովրդավարության ինստիտուտի տնօրեն Լեյլա Յունուսի, «Ադրբեջանն առանց քաղբանտարկյալների» հասարակական դաշինքի համակարգող Օգտայ Գյուլալիեւի ու Քաղբանտարկյալների մշտադիտարկման կենտրոնի ղեկավար Էլշան Հասանովի կողմից՝ քաղաքացիական հասարակության տասնյակ ակտիվիստների օգնությամբ։
Ապրիլի 1-ին կայացած մամուլի ասուլիսի ժամանակ Գյուլալիեւը հայտնել է, որ վերջերս ազատ են արձակվել 160 քաղբանտարկյալներից միայն մի քանիսը։ Մասնավորապես բլոգեր Աբդուլ Աբիլովը, Ադրբեջանի ազգային ճակատ կուսակցության ակտիվիստ Էլվին Աբիլովը, ընդդիմադիր լրագրող Գանիմաթ Զահիդի ազգականներ Ռովշան ու Ռուֆաթ Զախիդովները, Պետական պաշտպանության հատուկ ծառայության նախկին աշխատակից Ասիֆ Լյատիֆովը, կրոնական ակտիվիստներ Նամիգ Կիշիեւն ու Նիջատ Ալիեւը, լրագրող Իկրամ Ռաֆիգօղլուն, ակտիվիստ Զեյնալա Բագիրզադեն։ Միաժամանակ կալանավորվել են լրագրող Էլչին Իսմաիլլին, բլոգերներ Մեհման Հուսեյնովն ու Մեհման Գալանդարովը, աստվածաբան Սարդար Բաբաեւը, ՊՆՖԱ կուսակցության անդամ Էլնուր Ֆարաջաեւը ու Մուսուլմանական միասնականություն շարժման ակտիվիստ Էլհան Իսկենդերովը։ «Այդ բոլորին առաջադրվել են կեղծ մեղադրանքներ։ Իրականում նրանց կալանավորել են նրանց հասարակական , քաղաքական կամ լրագրողական գործունեության համար։ Մենք նրանց քաղբանտարկյալ ենք համարել՝ ԵԽԽՎ կողմից որոշված չափանիշներով»,- հայտնել է Գյուլալիեւը։
Պոտենցիալ քաղբանտարկյալ են համարվում եւս 11 մարդ, որոնց դատապարտել են 2016-ի հունվարին Սիյազան քաղաքում գների բարձրացման դեմ բողոքի ակցիային մասնակցելու համար։