Հայաստանի կառավարությունն այսօր՝ ապրիլի 20-ին տեղի ունեցած նիստի ժամանակ «Լիդիան Արմենիա» ՓԲԸ-ի ներկրած ապրանքները երեք տարով ազատել է ավելացված արժեքի հարկից։ Որոշման համապատասխան նախագիծը ներկայացրել է ՀՀ տնտեսական զարգացման եւ ներդրումների նախարար Սուրեն Կարայանը։
«Լիդիան Արմենիա» ՓԲԸ-ն (նախկին «Գեոթիմ» ՓԲԸ-ն) Սյունիքի եւ Վանաձորի մարզերում երկրաբանական-հետախուզական աշխատանքներ է իրականացրել, ինչի հետեւանքով հայտնաբերվել են ոսկու կվարցիտի հանքաղբյուրներ»։ «Լիդիան Արմենիա» ՓԲԸ-ի նպատակն է ներդրումային ծրագրի շրջանակներում կառուցել ու շահագործել Ամուլսարում ոսկու կվարցիտի հանքաղբյուրը։ Հանքաղբյուրի շահագործման ընթացքում կստացվի մոտ 2 մլն ունցիում ոսկի եւ 3 մլն ունցիում արծաթ, որոնք ամբողջությամբ կարտահանվեն։ Նախատեսվում են մոտ 179,4 մլրդ դրամի ներդրումներ, որոնցից 26,7 մլրդ դրամը՝ սարքավորումների համար։
Ներդրումային ծրագրի իրականացման արդյունքում, համաձայն ներկայացված հիմնավորման, մոտ 465 աշխատատեղ կստեղծվի՝ 525 հազար դրամ միջին աշխատավարձով՝ 2017 եւ 2018 թվականներին եւ 490 հազար դրամ՝ 2019 թվականներին։
