Վրաստանին ՆԱՏՕ-ին անդամակցություն է պետք, ոչ թե անամության գործողությունների ծրագիր (ԱԳԾ): ՆԱՏՕ-ի Խորհրդարանական վեհաժողովի քաղաքական հանձնաժողովի նիստում այս մասին հայտարարել է Վրաստանի ԱԳ նախարար Միխայիլ Ջանելիձեն:
Պատասխանելով լիտվացի պատգամավորի հարցին, կիսո՞ւմ է տեսակետը, որ ժամանակին Վրաստանի համար անդամության գործողությունների ծրագրի խոստումը զայրացրեց Ռուսաստանին, Ջանելիձեն պատասխանել է, որ դա Ռուսաստանի հորինվածքն է:
«Լինի անդամակցություն, թե՝ ԱԳԾ, դա ուղղված չէ Ռուսաստանի դեմ: ՆԱՏՕ-ին մեր անդամակցությունը մեր անվտանգությունն է: Վրաստանի ինքնիշխան ընտրությունն է՝ ազատ աշխարհի մաս կազմել, որի հետ մենք ընդհանուր արժեքներ ունենք: Դա ոչ թե ինչ-որ մեկին զայրացնելու, այլ ոչ միայն Վրաստանում, այլեւ տարածաշրջանում կայունության եւ անվտանգության ստեղծման նպատակ է հետապնդում: ԱԳԾ-ն մեր վերջնական նպատակը չէ»,- հայտարարել է Ջանելիձեն: