Երեւանի ավագանու այսօրվա արտահերթ նիստը թեժ է անցել: Առաջին անգամ նիստին մասնակցել են նաեւ «Երկիր Ծիրանի» խմբակցության անդամները. նրանց բոյկոտը, փաստորեն, ընդամենը երկու նիստ տեւեց: Ավագանին քննարկել է Երեւանի քաղաքապետի տեղակալների ընտրության հարցը: Անակնկալներ այս հարցում չէին սպասվում. փոխքաղաքապետերը՝ Կամո Արեյանը, Արամ Սուքիասյանը, Վահե Նիկոյանը եւ Դավիթ Օհանյանը վերընտրվեցին: «Ելք»-ը որոշել էր ձեռնպահ մնալ, իսկ Զարուհի Փոստանջյանի կուսակցությունը դեմ քվեարկեց: Թեկնածուների հարցի քննարկումն ավելի քան թեժ էր:
«Երկիր Ծիրանի» խմբակցությունը միայն քննադատությամբ չբավարարվեց: Սոնա Աղեկյանը Տարոն Մարգարյանին մեղադրեց մանկապարտեզ ընդունելիս յուրաքանչյուր երեխայի համար 200 դոլար կաշառք վերցնելու մեջ: Այս հայտարարությունը հունից հանեց հանրապետականներին: Լեւոն Իգիթյանը մարտական տեսքով բարձրացավ տեղից, բայց հետո, թերեւս ինչ-որ մեկի հորդորով, նորից նստեց: Քաղաքապետը ստիպված էր արձագանքել Աղեկյանի մեղադրանքներին:
Ընդմիջումից հետո նիստում կրքերը գագաթնակետին հասան: «Երկիր Ծիրանի» խմբակցության քարտուղար Մարինա Խաչատրյանը փորձեց արտահերթ ելույթ ունենալ, մինչդեռ քաղաքապետը հայտարարեց, որ կանոնակարգի համաձայն՝ արտահերթ ելույթի իրավունք ունի միայն խմբակցության ղեկավարը: Զարուհի Փոստանջյանը տեղից արձագանքեց, որ Խաչատրյանին լիազորում է ելույթ ունենալ խմբակցության անունից, բայց Տարոն Մարգարյանն անդրդվելի էր: Փոստանջյանը վրդովվեց. սա հակասահմանադրական է: Քաղաքապետարանում, իր իսկ բնորոշմամբ, «գողական, խուժանական բարքեր են տիրում»: Այս անգամ հանրապետական կանայք վրդովվեցին. հայ կնոջը հարիր բառապաշար չէ:
Արդեն նիստի ավարտից հետո լրագրողները Տարոն Մարգարյանից հետաքրքրվեցին. Զարուհի Փոստանջյանի խոստացած դժոխքն իրականություն դարձա՞վ, թե՞ ոչ:
Ի դեպ՝ «Երկիր Ծիրանի» կուսակցությունը հայտարարել է հունիսի 12-ին տեղացած հորդառատ անձրեւների հետեւանքների համար Տարոն Մարգարյանի դեմ դատական գործընթաց սկսելու մասին: Քաղաքային իշխանություններին Փոստանջյանի կուսակցությունը մեղադրում է անգործության համար: Տարոն Մարգարյանը սրանում քաղաքապետարանի մեղավորությունը չի տեսնում, իսկ իր դեմ դատական հայցին լուրջ չի վերաբերվում:
87 տարեկանում մահացել է Գերմանիայի նախկին կանցլեր Հելմուտ Կոլը: Նա Գերմանիայի կառավարությունը ղեկավարել է 1982-1998 թվականներին: Նա միակ քաղաքական գործիչն է, որը կանցլերի պաշտոնը զբաղեցրել է չորս անգամ անընդմեջ: Հելմուտ Կոլը մեծ դեր է ունեցել Եվրոպայի եւ Գերմանիայի միավորման, ինչպես նաեւ «սառը պատերազմի» դադարեցման գործում: Կոլը մշտապես թուրքերի՝ Գերմանիա ներգաղթի դեմ էր արտահայտվում: Մեծ Բրիտանիայի վարչապետ Մարգարեթ Թետչերի հետ հանդիպումներից մեկում, որի արձանագրությունն ավելի ուշ գաղտնազերծվել է, Կոլը նույնիսկ խոսել է չորս տարվա ընթացքում Գերմանիայում թուրքերի թիվը 50 տոկոսով կրճատելու՝ իր ծրագրերի մասին:
Երեւանում տղամարդու դի են հայտնաբերել՝ անկողնում կիսամերկ պառկած: 51-ամյա Գրիգոր Հարությունովի մարմնի վրա բռնության հետքեր են հայտնաբերել: Սպանության հոդվածով քրեական գործ է հարուցվել: Հարությունովին սպանելու մեջ կասկածում են 21-ամյա հարսին: Ըստ տեղեկությունների՝ սկեսրայրը փորձել է սեռական ոտնձգություն կատարել հարսի նկատմամբ: Երիտասարդ կինը դիմադրել է եւ ինքնապաշտպանվելով՝ արդուկով հարվածել տղամարդուն:
Երեւանում մահվան ելքով վրաերթ է տեղի ունեցել: 29-ամյա Լեւոն Խաչատրյանը BMW մակնիշի ավտոմեքենայով վրաերթի է ենթարկել տատին ու թոռանը՝ 80-ամյա Ծաղիկ Գրիգորյանին եւ 3-ամյա Սերյոժա Գեւորգյանին: Մարմնական վնասվածքներով հիվանդանոց տեղափոխված տղան մահացել է: Քրեական գործ է հարուցվել:
Ռուսաստանում դժբախտ պատահարի հետեւանքով հայ երիտասարդ է մահացել: Սանկտ Պետերբուրգի ավտոտեխսպասարկման կետերից մեկում, որտեղ աշխատել է 24-ամյա երիտասարդը, հրդեհ է բռնվել: Նրա հագուստը սկսել է այրվել, երիտասարդը գործընկերոջը խնդրել է տարայով ջուր լցնել իր վրա: Վերջինը, սակայն, պատահմամբ նրա վրա բենզին է լցրել: Ստացած այրվածքներից տղան մահացել է: Նա Արարատի մարզի բնակիչ էր: Երիտասարդի մարմինն այսօր հողին են հանձնել հայրենի Արտաշատում:
Հունիսի 16-ին դոլարը շարունակել է արժեզրկվել, իսկ եվրոն թանկացել է: Դոլարի փոխարժեքն արդյունքում կազմել է 481 դրամ, եվրոյինը՝ 538, ռուբլունը՝ 8 դրամ 35 լումա, ֆունտինը՝ 614 դրամ:
Հունիսի 17-ին շրջանների մեծ մասում տեղումներ են սպասվում, առանձին վայրերում կարկուտի հավանականություն կա: Օդի ջերմաստիճանն էապես չի փոխվի, իսկ 18-20-ը 4-5 աստիճանով կբարձրանա: Երեւանում վաղը տեղումներ չեն սպասվում: Մայրաքաղաքում գիշերը կդիտվի +16+18, ցերեկը՝ +25+27 աստիճան տաքություն:
